दाङमा प्रेमीकै अगाडि प्रेमिकामाथि सामुहिक बलात्कार


प्रकाशित मिति : 5 August, 2020 6:31 am

दाङ, २१ साउन । दाङको देउखुरीमा एक युवतीमाथि सामुहिक बलात्कार भएको छ । युवतीमाथि बलात्कार भएको केही समयमै प्रहरीले दुई जनालाई पक्राउ गर्न सफल भएको छ ।

राप्ती गाउँपालिका– ३ नयाँबस्ती मसुरीयाकी १७ वर्षीया युवतीलाई राप्ती गाउँपालिका–४ का अन्दाजी २५ वर्षका अर्जुन विक, सोही वडाका २७ वर्षका प्रकाश नेपाली, २३ वर्षका इसब जिसी र १९ वर्षका भुपाल थापामगरले बलात्कार गरेको पीडित युवतीले प्रहरी समक्ष बताएकी छन् ।

बलात्कार अभियोग लागेका चार जनामध्ये २ जनालाई भालुवाङ प्रहरीले पक्राउ गरेको छ । पक्राउ पर्नेमा इसब जिसी र भुपाल थापा मगर रहेको इलाका प्रहरी कार्यालय भालुवाङका प्रहरी निरीक्षक गंगाबहादुर सारु मगरले जानकारी दिए । अन्य फरार दुई जनाको खोजी भइरहेको उनले बताएका छन् ।

पीडित युवती आफ्नो प्रेमीसँग गत साउन १६ गते दिउँसो घर नजिकको सामुदायिक जङ्गल नजिकैको खोलामा नुहाउन गएका बेला चार जनाको समूहमा आएका ती युवाहरूले युवतीकी प्रेमीलाई कुटपिट गरी घाइते बनाएर बलात्कार गरेको पीडित युवतीको भनाइ छ ।

युवतीले प्रहरी समक्ष दिएको बयानअनुसार त्यो दिन महिनावारी भएकोले जङ्गलमा रहेको बगिया खोलामा नुहाउन गएकी थिएँ । नुहाएर कपडा बदल्ने बेला एक्कासी आएको युवाको समूहले प्रेमीलाई कुटपिट गरी घाइते बनायो ।

ती चार जनाको युवा समूहले कसैलाई भने ज्यान मार्ने समेत धम्की दिएको पीडित युवतीले बताएकी छन् । पीडित युवतीको स्वास्थ्य परीक्षणपछि जाहेरी समेत दर्ता भएर थप अनुसन्धान भइरहेको प्रहरीले जानकारी दिएको छ ।

प्रतिक्रिया दिनुहोस्