पर्सामा ४४ जना थुनुवासहित प्रदेश–२ मा १७९ जनामा कोरोना संक्रमण
पर्सा, २३ साउन । कोरोनाको ‘हटस्पट’ बनेको पर्सामा आज (शुक्रबार) जिल्ला प्रहरी कार्यालय पर्साका ४४ जना थुनुवासहित प्रदेश–२ मा १७९ जनामा कोरोना संक्रमण पुष्टि भएको छ ।
पछिल्लो २४ घण्टामा ३१ महिलासहित १७९ जनामा कोरोना संक्रमण पुष्टि भएको प्रदेश–२ स्वास्थ्य निर्देशनालका बरिष्ठ अधिकृत विजय झाले जानकारी दिएका छन् ।
पर्सामा सबभन्दा बढी १९ महिलासहित १३३ जना छन् । जसमध्ये जिल्ला प्रहरी कार्यालय पर्साका मात्र ४४ जना थुनुवा र एक प्रहरीका जवान गरी ४५ जना रहेको निर्देशनालयले जनाएको छ । सप्तरीका १८ जना, धनुषाका १० जना, सर्लाहीका ९ जना, रौतहटका ४ जना र बाराका १ जनामा संक्रमण पुष्टि भएको हो ।
यससँगै प्रदेश २ मा कोरोना संक्रमितको संख्या ५ हजार ५१४ पुगेको छ । पछिल्लो २४ घण्टामा उपचार पश्चात ९ महिलासहित ४० जना संक्रमित उपचार पश्चात निको भएर घर फर्केका छन् । हालसम्म प्रदेश २ मा कोरोना संक्रमणबाट २५ जनाको मृत्यु भइसकेको छ ।
