गोंगबुमा सुटकेशमा भेटिएको शवको पहिचान खुल्यो
काठमाडौं, २६ साउन । काठमाडौंको गोंगबुमा विभत्स अवस्थामा सुटकेशमा फेला पारिएको शवको पहिचान खुलेको छ ।
विभत्स रुपमा हत्या गरी सुटकेशमा हालेर फालिएको शव दाङका कृष्णबहादुर बोहराको भएको खुलेको प्रहरीले जानकारी दिएको छ । शवको सनाखत नहुँदा अनुसन्धानले गति लिन नसकेपछि प्रहरीले शवको तस्वीर सार्वजनिक गर्दै पहिचानका लागि प्रहरीलाई सहयोग गर्न आग्रह गरेको थियो ।
त्यसपछि शव बोहराको भएको खुलेको हो । उनी नयाँ बजार क्षेत्रको एक उद्योगमा काम गर्ने गरेको पाइएको प्रहरी स्रोतले जानकारी दिएको छ । मृतकको सनाखत भएसँगै काठमाडौं प्रहरी परिसर र अपराध अनुसन्धान महाशाखाको टोली अहिले गोंगबु पुगेको छ ।
आइतबार गोंगबु चोक नजिकै सुटकेशभित्र टाउको र खुट्टा विनाको शव भेटिएको थियो । कुकुरको सहयोगमा प्रहरीले त्यसको तीन सय मिटर पर टाउको र खुट्टा भेटेको थियो । शव पहिचानका लागि प्रहरीले गोंबगु क्षेत्रका करीब एक हजार व्यक्तिसँग सोधीखोजी गरेको थियो ।