अछाम अस्पतालमा भेन्टिलेटर नहुँदा ३४ वर्षीय कोरोना संक्रमित युवाको गयो ज्यान
अछाम, ११ असोज । जिल्ला अस्पताल अछाममा भेन्टिलेटर नहुँदा एक ३४ वर्षीय कोरोना संक्रमित युवकको ज्यान गएको छ ।
जिल्ला अस्पताल अछाममा उपचाररत बान्नीगढी जयगढी गाउँपालिका–३ का ३४ वर्षीय युवकको शनिबार राति निधन भएको स्वास्थ्य कार्यालय अछामका प्रमुख झनक ढुंगानाले पुष्टि गरे ।
उनले युवाको स्वास्थ्यमा समस्या भएपछि शुक्रबार बिहान अस्पताल पुर्याइएको र राति ९ बजे उनको मृत्यु भएको जानकारी दिए ।
गत भदौ २५ गते भारतबाट फर्किएका उनलाई बान्नीगढ जयगढ गाउँपालिका–३ स्थित सरस्वती माध्यमिक विद्यालयको क्वारेन्टिनमा राखिएको थियो । त्यहाँ रहेका उनीसहित १९ जनाको कोरोना परीक्षण गर्दा सबैमा संक्रमण पुष्टि भएको थियो ।
अस्पतालमा आईसीयू सेवा नहुँदा संक्रमितलाई बचाउन नसकिएको बान्नीगढी जयगढी गाउँपालिकाका अध्यक्ष राजेन्द्रबहादुर खड्काले जानकारी दिएका छन् । संक्रमितमा कोरोनाका लक्षण समेत देखिएकाले स्वास्थ्य जटिल रहेको जानकारी दिंदै गाउँपालिका अध्यक्ष खड्काले भने, ‘राख्न भेन्टिलेटर नहुँदा धनगढी लैजाने तयारी गर्दागर्दै राति नै मृत्यु भइहाल्यो ।’
