प्रदेश-५ को स्थायी राजधानी दाङको देउखुरी पारित : पक्षमा ६९, विपक्षमा खस्यो १३ मत
बुटवल, २० असोज । प्रदेश-५ को स्थायी राजधानी राप्ति नदीको किनार देउखुरी उपत्यकामा राख्ने प्रस्ताव प्रदेशसभाबाट पारित भएको छ ।
मंगलबार भएको मतदानमा प्रदेशसभाका बहुमत सदस्यले सरकारले प्रस्ताव गरेको राजधानीकै पक्षमा मतदान गरेपछि प्रस्ताव पारित भएको हो ।
प्रस्तावित राजधानी देउखुरी उपत्यकाको पक्षमा र ६९ मत र विपक्षमा १३ मत परेको थियो । प्रदेशसभामा भएका कूल ८९ जना सांसदमध्ये मतदानमा ८२ जनाले भाग लिएका छन् ।
प्रमुख प्रतिपक्षी दल कांग्रेसले भने सोमबार प्रस्तावित नाम र राजधानीको विरोध गर्दै नाराबाजी र तोडफोड समेत गरेको थियो । सरकारले प्रदेशसभामा दर्ता गराएको नाम र राजधानीको प्रस्ताव पारित गराउनका लागि सत्तारुढ दल नेकपाले ह्वीप जारी गरेको थियो ।