अदितीको आजको राशीफल : नेपाल–भारत दुबैमा चर्चा !
काठमाण्डौं, २६ माघ : नायिका अदिती बुढाथोकीको वहुप्रतिक्षित चलचित्र ‘कृ’ आजदेखि नेपालमा रिलिज भएको छ । उनले नायक अनमोल केसीसँग स्क्रिन शेयर गरेकी छन् ।
दर्शकले लामो समय कुरेको चलचित्र हलमा गएको दिन चलचित्रमा अभिनय गरेका कलाकार खुशी हुनु स्वभाविक हो । तर, आजको संयोग अदितीका लागि अलि फरक खालको छ । उनले डबर खुशी हुने अवसर पाएकी छन् । आज रिलिज भएको चलचित्र ‘कृ’ की नायिका अदिती बुढाथोकीबारे ‘इन्स्टाग्राममा सुन्दर भारतीय महिला’ भनेर समाचार कभरेज भएको छ ।
अदितीबारे यस अगाडि पनि भारतीय नायिका सन्नी लियोनीसँग दाँजेर समाचार सार्वजनिक भएको थियो । एक भारतीय अनलाइनले अदितीलाई ‘इन्स्टाग्रामका चर्चित ८ सुन्दर भारतीय महिला’ को सूचीमा राखेर समाचार लेखेको छ । इन्स्टाग्रामको उक्त समाचारमा प्रतिक्रिया स्वरुप अदितीले आफू भारतीय नरहेको जनाउँदै सूचीमा समावेश गरेकोमा धन्यवाद दिएकी छन् ।