‘कोरोना भाइरसले मानिसको रोगसँग लड्ने तत्व एन्टीबडी तीब्र गतिमा घट्दै’
काठमाडौं, १२ कार्तिक । अनुसन्धानकर्ताहरूले कोरोना भाइरस सङ्क्रमणपछि मानिसहरूको प्रतिरक्षात्मक एन्टीबडी एकदमै तीव्र गतिमा घटेको पाइएको बताएका छन् ।
कोषहरूभित्र भाइरसविरुद्ध लड्न शरीरले तयार पार्ने तत्व एन्टीबडी हाम्रो रोग प्रतिरोधी क्षमताको एउटा महत्वपूर्ण हिस्सा हो । इम्पेरिअल कलेज लन्डनका अनुसन्धानकर्ताहरूका अनुसार कोरोना भाइरस सङ्क्रमण पुष्टि भएका मानिसहरूमा जून महिनादेखि सेप्टेम्बर महिनाको बीचमा २६ प्रतिशतले एन्डीबडी घटेको पाइएको छ ।
यसले बिरामीका रोग प्रतिरोधी क्षमता कम भएको र कोरोना भाइरसले धेरै पटक सङ्क्रमित बनाउने जोखिम देखिएको उनीहरूले बताएका छन् । यूकेमा अक्टोबर महिनाको तेस्रो सातातिर कोभिड १९ का कारण मृत्यु हुने मानिसहरूको संख्या ६० प्रतिशतले बढेको विवरण सार्वजनिक भएकै समयमा पछिल्लो अध्ययनको निष्कर्ष आएको हो ।
रिएक्याट टू नामक अध्ययनका क्रममा साढे तीन लाख मानिसहरू एन्टीबडी परीक्षणमा सामेल भएका थिए । जून महिनाको अन्त्यतिर र जुलाई महिनाको शुरूतिर गरिएको परीक्षणका क्रममा एक हजारमध्ये ६० जनामा एन्टीबडिज पत्ता लगाउन सकिने अवस्थामा देखिएको थियो ।
तर सेप्टेम्बर महिनामा गरिएको परीक्षणका क्रममा एक हजारमध्ये ४४ जनामा मात्रै त्यस्तो अवस्था देखियो। यसले गर्मी र शरद यामको बीचमा एक चौथाइभन्दा बढीले एन्टीबडिज घटेको देखाउँछ ।
अध्ययनमा सहभागीमध्ये एक प्राध्यापक हेलेन वार्डले भनिन्, ‘रोग प्रतिरोधी क्षमता एकदमै तीव्र गतिमा घटिरहेको देखिन्छ । पहिलो परीक्षण गरिएको अहिले तीन महिना पुगेको छ र हामीले एन्टीबडिजमा २६ प्रतिशतले कमी आएको देखिरहेका छौं ।’ स्रोतः बिबिसी
