‘सुसाइड नोट’ लेखेर भक्तपुरका डाक्टर दिगम्बर झा बेपत्ता
भक्तपुर, २५ कार्तिक । भक्तपुरको द डेण्टल सिटीका निर्देशक डा. दिगम्बर झा ‘सुसाइड नोट’ लेखेर बेपत्ता भएका छन् ।
डा. झा सुसाइड नोट लेखेर बेपत्ता भएको जानकारीपछि महानगरीय प्रहरी परिसर भक्तपुरले खोजीलाई तीब्रता दिएको एसपी तारादेवी थापाले बताइन् । उनी ठिमीस्थित द डेन्टल सिटीका निर्देशक हुन् ।
बिहान ५ बजेतिर बा.१६ च. ८६७९ नम्बरको कारमा उनी घरबाट निस्केका थिए । डेन्टल क्लिनिकको माथिल्लो तलामा भाडामा बस्दै आएका डा. झा र उनको बुवा, आमा र बहिनीहरुको सम्बन्ध राम्रो नभएको जनाइएको छ । घरबाट निस्केको दुई घण्टामा उनी काभ्रे पुगेको प्रहरी अनुसन्धानबाट थाहा भएको छ ।
‘उँहाको खोजी भइरहेको छ’ एसपी थापाले भनिन्, ‘फेसबुक पेजमा सुसाइड नोट लेखेको भेटिएको छ ।’ फेसबुक पेजमा सुसाइड नोट लेखेको देखेपछि उनका सहकर्मी डाक्टर निरञ्जन चालिसेले प्रहरीलाई खबर गरेका थिए ।