कलङ्कीमा विहानै डरलाग्दो दुर्घटना : ट्रकले ट्रकलाई ठक्कर दिंदा तीन जनाको मृत्यु
काठमाडौं, २७ कार्तिक । काठमाडौंको कलङ्कीमा आज (बिहीबार) बिहानै पार्किङ गरेर राखेको ट्रकलाई अर्को ट्रकले ठक्कर दिंदा तीन जनाको ज्यान गएको छ ।
मकालु पेट्रोल पम्प छेउमा पार्किङमा राखेको बा ३ ख ७५३० नम्बरको ट्रकलाई बा ५ ख ८८६५ नम्बरको ट्रकले ठक्कर दिएको हो । दुर्घटनामा बा ५ ख ८८६५ नम्बरको ट्रकमा सवार तीन जनाको ज्यान गएको प्रहरीले जानकारी दिएको छ ।
तीव्र गतिका कारण दुर्घटना भएको प्रारम्भिक अनुसन्धानबाट खुलेको छ । ८८६५ नम्बरको ट्रक कुखुरा बोक्ने ट्रक हो ।
दुर्घटनामा नुवाकोट सुन्दरदेवी गाँउपालिकाका २४ वर्षीय रोशन तामा, नुवाकोट तारकेश्वरका ३७ वर्षीय माधव घिमिरे र एक जना अन्यको शहीद मेरोरियर अस्पतालमा उपचारका क्रममा मृत्यु भएको महानगरीय प्रहरी वृत्त कालीमाटीका डीएसपी अपिलराज बोहराले जानकारी दिए ।
दुर्घटनामा घाइते भएका नुवाकोटका विजय तामाङको अवस्था गम्भीर रहेको डीएसपी बोहराले बताए । दुवै ट्रकका चालकलाई प्रहरीले नियन्त्रणमा लिएर आवश्यक अनुसन्धान शुरु गरेको छ ।