प्रदेश–१ मा एमालेका प्रदीप भण्डारी सभामुखमा सर्वसम्मत
मोरङ, २८ माघ : प्रदेश–१ सभामुखमा नेकपा एमालेका प्रदिप भण्डारी सर्वसम्मत भएका छन् । एमाले संसदीय दलको बैठकले सुनसरीका भण्डारीलाई सभामुख बनाउने निर्णय गरेको हो ।
चर्चामा धेरैलाई ल्याइएको भए पनि संसदीय दलको बैठकबाट भण्डारीलाई चयन गरिएको नेकपा एमाले प्रदेश–१ का प्रदेश संयोजक भीम आचार्यले जानकारी दिए । २२ गते बसेको पहिलो संसद बैठकबाट सभामुखको चुनाव मिति सोमबारलाई तय गरेसँगै आइतबार मनोनय दर्ता भएको छ ।
कूल ५१ जना सांसद रहेको एमालेका पाँच जना सदस्यले सभामुख बन्नको लागि इच्छा देखाएका थिए । यो प्रदेशमा मुख्यमन्त्री र सभामुख एमालेले पाउने सहमति भएको थियो । त्यसै अनुसार एमालेले मुख्यमन्त्रीका लागि शेरधन राइलाई संसदीय दलको नेतामा चयन गरिसकेको छ ।