तिहारको बेला दुःखमा हङकङका नेपाली : आगलागीबाट ७ जनाको मृत्यु, ११ घाइते
काठमाडौँ । हङकङमा नेपालीले सञ्चालन गरेको एक क्लबमा आइतबार राती आगलागी हुँदा सात जना नेपालीको मृत्यु भएको छ। आगलागीमा परेर ११ जना घाइते भएका छन् ।
हङकङबाट प्रकाशित एभरेष्टखबरका प्रधान सम्पादक किशन राईका अनुसार जोर्डनको याउमातेइस्थित क्यान्टोन रोडस्थित एक नेपाली क्लबमा आइतबार राती करिब ८ ३० बजेतिर आगलागी भएको हो ।
जिरे खुर्सानी नामक क्लबमा तिहारको दियोबाट आगो सल्किएको हो । मृत्यु हुनेहरुमा चार पुरुष र तीन महिला रहेका छन् । मृत्यु हुनेमा अधिकांश बागलुङ जिल्लाका हुन्।
बागलुङका राज कँडेलको छोराको जन्मदिन मनाउने क्रममा आइतबार राती आगलागीको कारण अधिकांस बागलुङका परेका हुन् ।
यसैबीच हङकङकी प्रमुख कार्यकारी क्यारी लामले सोमबार घटनास्थलको निरीक्षण गरेकी छिन् । प्रमुख लामले अधिकारीहरूलाई घाइतेको उपचारमा ध्यान दिन र घटनाको कारण पत्ता लगाउन निर्देशन दिएकी छन्।
