कोरोनाबाट स्वास्थ्यकर्मी गौरीशंकर देवको निधन
काठमाडौं, ७ मंसिर । कोरोना भाइरसको संक्रमणपछि अस्पतालमा उपचाररत स्वास्थ्यकर्मी गौरीशंकर देवको निधन भएको छ ।
सिरहाको कल्याणपुर नगरपालिका स्वास्थ्य शाखा प्रमुखका रुपमा कार्यरत जनस्वास्थ्य अधिकृत देवको शनिबार राति १०ः४० बजे विराटनगरस्थित नोबेल मेडिकल कलेजमा उपचारका क्रममा निधन भएको हो । उनलाई १७ दिन अघि कोरोना पोजिटिभ देखिएको थियो ।
कोरोना पोजिटिभ देखिएपछि उनको स्वास्थ्य गम्भीर भएको थियो । उनलाई आइसियुमा राखेर उपचार गरिएको थियो । विगत ३० वर्षदेखि स्वास्थ्य सेवामा कार्यरत देवको निधनले स्वास्थ्य क्षेत्रमा अपुरणीय क्षति पुगेको नेपाल स्वास्थ्यकर्मी युनियनले जनाएको छ । ५४ वर्षीय देव युनियनका सहसचिव थिए । उनको परिवारमा बाबु, आमा, श्रीमती, छोरा, छोरी छन् ।