श्रीमतिको मृत्युपछि १४ वर्षीया छोरामाथि लगातार बलात्कार, ३७ वर्ष जेल सजाय
मकवानपुर, ११ मंसिर । श्रीमतिको मृत्युपछि आफ्नै १४ वर्षीया छोरामाथि लगातार बलात्कार गर्दै आएका एक व्यक्तिलाई ३७ वर्ष कैद सजाय सुनाइएको छ ।
जिल्ला अदालत मकवानपुरले आफ्नै छोरी बलात्कारमा संलग्न एक बाबुलाई ३७ वर्ष कैद सजायको फैसला गरेको हो ।
१४ वर्षीया छोरीलाई पटक–पटक बलात्कार गरेको अभियोगमा न्यायाधीश सीता शर्माको एकल इजलासले ४२ वर्षीय बाबुलाई ३७ वर्ष जेल सजाय गर्न आदेश दिएको हो ।
उनी आठ महिनाअघि पक्राउ परेका थिए । छोरीलाई बलात्कार गरेको थाहा पाएपछि छिमेकीले प्रहरीलाई खबर गरेपछि ३० चैतमा उनलाई प्रहरीले पक्राउ गरेको थियो ।
मकवानपुरकै ती पुरुषले आफ्नी पत्नीले आत्महत्या गरेपछि छोरीलाई बलात्कार गर्न थालेका अनुसन्धानबाट खुलेको छ । उनले चार वर्षदेखि छोरीलाई बलात्कार गर्दै आएका थिए । नयाँ मुलुकी संहिता अनुसार जबरजस्ती करणीमा १२ वर्ष र हाडनाता करणीमा २५ वर्ष गरी उनलाई ३७ वर्ष कैद सजाय सुनाइएको अदालत स्रोतले जनाएको छ ।
