प्रचण्डको एक फोनले फेरिए जम्मरकट्टेल, मन्त्री बन्न तयार
हेटौंडा, २९ माघ : नेकपा माओवादी केन्द्र सरकारमा नजान सक्ने संकेत दिइरहेका माओवादी नेता शालिकराम जम्मरकट्टेल पार्टी अध्यक्ष पुष्पकमल दाहाल प्रचण्डको एक फोनमै फेरिएका छन् ।
प्रदेश–३ को सरकारमा पार्टीबाट सहभागी हुने नेताको नाम दिन आनाकानी गरिरहेका जम्ममरकट्टेल प्रचण्डको फोनपछि सरकारमा सहभागी भएका छन् । पार्टी एकताबारे ठोस सहमति नभएको भन्दै माओवादीले नाम दिन मानेको थिएन । तर, एमाले अध्यक्ष केपी शर्मा ओलीसँग वार्ता भएपछि माओवादी अध्यक्ष प्रचण्डले उनलाई फोन गरेर सरकारमा सहभागी हुन निर्देशन दिएका छन् । जम्मरकट्टेलले भने, ‘सपथग्रहणमा जाने भन्ने टुंगियो । मन्त्रालय अझै प्रष्ट भएको छैन ।’
जम्मरकट्टेलले आन्तरिक मामिला तथा कानुन मन्त्रालय दाबी गर्दै आएका छन् । केन्द्रीय सरकारको गृह मन्त्रालयसरहको मानिने यस मन्त्रालय प्रदेशमा मुख्यमन्त्रीपछिको शक्तिशाली मन्त्रालय मानिन्छ । सोमबार विहान मात्र शपथ लिएका मुख्यमन्त्री डोरमणि पौडेल मन्त्रिपरिषद् गठनको तयारी छन् । उनले एमाले र माओवादीका एक÷एक मन्त्री नियुक्त गर्नेछन् । पौडेल निकट स्रोतका अनुसार एमाले प्रदेशसभा सांसद केशव स्थापित भौतिक पूर्वाधार मन्त्री बन्नेछन् । माओवादी संसदीय दलका नेता शालिकराम जम्मरकट्टेल पनि मन्त्री बन्ने भएका छन् ।