मिर्गौलापीडितको उपचारमा समस्या
खोटाङ, ३ माघ । दुवै मिर्गौलापीडित खोटाङका ५२ वर्षीय कृष्ण खत्रीको औषधि उपचारमा समस्या देखिएको छ । खोटाङको दिप्रुङ चुइचुम्मा गाउँपालिका–५ स–छितापोखरीका खत्रीको औषधि उपचारमा समस्या देखिएको हो । हप्तामा दुई पटक मिर्गौलाको डायलासिस गराइरहेका खत्रीका दुवै मिर्गाैला काम नलाग्ने भएको छ ।
‘वीरेन्द्र सैनिक अस्पताल काठमाडौँमा चार वर्षदेखि डायलासिस गराइरहेको छु’, उनले भने । चार वर्षदेखि दुवै मिर्गौला फेल भएका उनले शुरुका करिब डेढ वर्ष आफ्नै खर्चमा डायलासिससहित सम्पूर्ण उपचार गराए पनि अहिले निःशुल्क डायलासिस गराउँदै आएका छन् । घरभाडा, आउजाउ गाडीभाडा र औषधि गरी मासिक रु ३५ हजारभन्दा बढी खर्च हुने गरेको उनको भनाइ छ ।
काठमाडौँको स्वयम्भूस्थित एउटा घरमा कोठा भाडामा लिएर एक्लै बस्दै आएका खत्रीको श्रीमती र दुई छोरा छन् । कान्छा सुदीप नेपाली सेनामा कार्यरत छन् भने जेठा आसन गाईघाटस्थित घरखेती सम्हाल्दै आएका छन् । नेपाली सेनाको युद्ध कवाज गण सीतापाइला काठमाडौँमा कार्यरत सुदीपले आफ्नो तलब तथा साहुको ऋण काढेर बुबाको उपचार गराइरहेको छ । ‘कान्छा छोराको तलब नहुने हो त यसअघि नै मरिसक्थे होला !’ उनले भने, ‘दुवै मिर्गाैला काम नलाग्ने भएपछि कम्तीमा एउटा फेर्नैपर्ने हुँदोरहेछ ! फेर्नका लागि आफूहरुसँग खर्च छैन । कसैले सहयोग गरे एउटा फेरेर भए पनि बाँच्ने थिएँ ।’
मिर्गाैला फेर्नका लागि अहिलेसम्म आफूलाई कसैले सहयोग गर्ने टुङ्गो नभएको पीडित खत्रीले बताए । ‘मिर्गाैला दिन आफन्त नै चाहिने रहेछ !’, उनले भने, ‘श्रीमती पनि बिरामी छिन् । उनी स्वस्थ रहेको भए दिने थिइ । छोराहरु आफैँले गरिखानुपर्यो ! यदि कसैले दिने नै भए पनि फेर्दा लाग्ने खर्च छैन ।’
घरखेती गरेर जीवन निर्वाह गर्दै आएका काका कृष्णको उपचारमा अहिलेसम्म करिब रु २० लाख खर्च भइसकेको पीडित खत्रीका भतिज पत्रकार दिलीप खत्रीले बताए । ‘काका सैनिक परिवारको भएकाले अस्पतालले वार्षिक रु एक लाख १० हजार बराबरको औषधिमा छुट दिने गरेको छ’, उनले भने, ‘अहिले भाइ सुदीपको तलबले खर्च नधानेर घरखेत समेत बिक्री गरिसक्नु भएको छ ।’
विसं २०५४ मा सम्पन्न स्थानीय निकायको निर्वाचनमा तत्कालीन नेकपा एमालेबाट वडा सदस्य समेत भएका कृष्ण व्यवसायका लागि उदयपुरको गाईघाट झरेका थिए । पछिल्लो समय गाईघाटस्थित त्रियुगा नगरपालिका–११ प्रगतिग्राममा बस्दै गर्दा बिरामी परेर उपचार गराइरहेका कृष्णलाई बिरामी भएपछि अहिलेसम्म पार्टीका कुनै पनि नेता तथा कार्यकर्ताले भेटेका छैनन् ।
आफू बिरामी भएपछि पार्टीका नेता तथा कार्यकर्तालाई पनि आफूले सम्पर्क नगरेको मिर्गाैला पीडित कृष्णले जानकारी दिए । ‘सहयोद्धाहरु सबैलाई सम्झिन्छु !’ उनले भने, ‘अहिले आफूले आस्था राखेकै पार्टी सरकारमा छ । तर अहिलेसम्म सञ्चो–बिसञ्चोको बारेमा कसैले सम्पर्क गरेर सोधेका छैनन् । दुःख लागेर आउँछ ।’
