महान्यायाधिवक्ता खरेलले इजलासमा पेस गरे प्रतिनिधिसभा विघटनसम्बन्धी राजपत्रको सूचना
काठमाडौं, ९ पुस । महान्यायाधिवक्ता अग्निप्रसाद खरेलले सर्वोच्च अदालतको संवैधानिक इजलासमा प्रतिनिधिसभा विघटन भएको सूचना प्रकाशित राजपत्र बुझाएका छन् ।
संवैधानिक इजलासमा बिहीबारको बहसमा नेपाल बार एशोसिएसनका पूर्व उपाध्यक्ष समेत रहेका वरिष्ठ अधिवक्ता टीकाराम भट्टराईले ‘प्रतिनिधिसभा विघटन भएको सूचना राजपत्रमा प्रकाशित छ कि छैन ?’ भन्दै प्रश्न उठाएका थिए ।
वरिष्ठ अधिवक्ता भट्टराईले बहस थाल्नुअघि नै बहस सुनेर बसेका महान्यायाधिवक्ता खरेल इजलासमा सहन्यायाधिवक्तालाई राखेर बाहिरिएका थिए । तर, भट्टराईले प्रश्न उठाएको राजपत्र भने आज खरेलले संवैधानिक इजलासमा बुझाएका हुन् ।
इजलासले राजपत्र पेश गर्न दिएको आदेश बमोजिम महान्यायाधिवक्ता अग्नि खरेलले शुक्रबारको इजलास शुरु हुनासाथ राजपत्र पेश गरेका हुन् । प्रधानमन्त्रीको सिफारिसमा राष्ट्रपतिबाट पुस ५ गते प्रतिनिधिसभा विघटन भएको थियो । राजपत्रमा सोही दिन सो सम्बन्धी सूचना प्रकाशित भएको थियो । तर संवैधानिक इजलासमा यसबारेमा प्रश्न उठेपछि शुक्रबार महान्यायाधिवक्ता अग्नि खरेलले राजपत्रको प्रति नै पेश गरेका हुन् ।