पेरिसडाँडामा नेकपा स्थायी कमिटी बैठक बस्दै
काठमााडौं, ११ माघ । नेपाल कम्युनिष्ट पार्टी (नेकपा) को आज (आइतबार) स्थायी कमिटी बैठक बस्दै छ । प्रतिनिधिसभा विघटनविरुद्ध शुक्रबार काठमाडौंमा शक्ति प्रदर्शन गरेको नेकपा (प्रचण्ड–माधव) पक्षले थप आन्दोलनका कार्यक्रमबारे छलफल गर्न स्थायी कमिटीको बैठक बोलाएको हो ।
प्रवक्ता नारायणकाजी श्रेष्ठले आइतबार साढे १२ बजे बैठक बस्ने जानकारी दिएका छन् । शनिबार उपलब्ध स्थायी कमिटी सदस्यहरुबीच केन्द्रीय कार्यालय पेरिसडाँडामा पार्टीको ९ गतेको विरोध सभाको समीक्षा र आगामी कार्यक्रमबारे सामान्य छलफल भएको थियो ।
आइतबार थप एजेण्डासहित स्थायी कमिटीको औपचारिक बैठक बस्ने श्रेष्ठले बताएका छन् ।
बैठकमा प्रधानमन्त्री केपी शर्मा ओलीलाई सोधिएको तीन दिने स्पष्टीकरण, पार्टीको महासचिव चयन, प्रदेश सरकारको अवस्थालगायतका विषयमा पनि छलफल हुनसक्ने नेताहरुले बताएका छन् ।
