चोरीका चार मोटरसाइकसहित सात युवा पक्राउ
भक्तपुर, ६ फागुन । चोरीका चार मोटरसाइकलसहित भक्तपुर प्रहरीले सात जनालाई पक्राउ गरेको छ । महानगरीय प्रहरी परिसर भक्तपुरका प्रहरी नायव उपरीक्षक दिपक गिरीका अनुसार चोरीका मोटरसाइकलसहित विभिन्न ठाउँबाट उनीहरुलाई पक्राउ गरिएको हो ।
पक्राउ पर्नेमा ओखलढुंगाको लिखु गाउँपालिका– ९ घर भएका २२ वर्षीय कुलबहादुर तामाङ, सोही ठाउँका २४ वर्षीय गोविन्द गौतम, ओखलढुंगाकै खिजी देम्बा गाउँपालिका–२ का २८ वर्षीय पञ्चमान तामाङ, दोलखाको शैलुङ गाउँपालिका–४ घर भई हाल ललितपुरको धोबिघाट बस्ने २७ वर्षीय अभिषेक योञ्जन, शैलुङ– ६ घर भई हाल भक्तपुरको सूर्यविनायक बस्ने १९ वर्षीय सुमन नेपाली, शैलुङ–२ घर भई हाल भक्तपुरको सूर्यविनायकमा बस्ने २३ वर्षीय फुर्वा तामाङ र सोही ठाउँका २१ वर्षी राजु तामाङ छन् ।
उनीहरुले भक्तपुरको सूर्यविनायक नगरपालिका–८ सिपाडोलका किसन थापाको घरबाट प्रदेश ३–०२–०१० प ७१४१ नम्बरको पल्सर, भक्तपुरको बाराही स्थानबाट पेम्बा तामाङको प्रदेश २–०२० प ८८२७, भक्तपुरबाटै बा.९८ प ८९६४ र भक्तपुरको ठिमीबाट प्रदेश ३–०२–०१७ प ७०४८ नम्बरको मोटरसाइकल चोरी गरेका प्रहरीले जानकारी दिएको छ । उनीहरुमाथि थप अनुसन्धान भइहेको प्रहरी नायव उपरीक्षक गिरीले जानकारी दिए ।
