बार्सिलोनाका लागि मेसीको कीर्तिमानी ७६८ औं खेल
स्वारेजले गरे खेल जीवनको ५ सयौं गोल
काठमाडौं, ९ चैत । लियोनल मेसीले बार्सिलोनाका लागि आइतबार कीर्तिमानी ७६८औं खेल खेलेका छन् । उक्त खेलमा उनले दुई गोल पनि गरे । बार्सिलोनाले स्पेनी ला लिगामा रियल सोसिडाडलाई सजिलै ६–१ ले हरायो ।
यस खेलपछि ३३ वर्षीय अर्जेन्टिनी खेलाडीले ज्याभीलाई उछिनेर बार्सिलोनाका लागि सर्वाधिक खेल्ने खेलाडी भएका हुन् । त्यस जितमा सर्जिनो डेस्टले पनि दुई गोल गरे भने एन्टोन ग्रिजमन र ओसमन डेम्बेलेले एक–एक गोल गरे ।
आइतबार नै लुइस स्वारेजले आफ्नो खेल जीवनको ५सयौं गोल गरे । स्वारेजको गोलमा एटलेटिको म्याड्रिडले एलाभेसलाई १–० ले हरायो । यो जितपछि एटलेटिको लिगको शीर्ष स्थानमा फेरि ४ अंकको अग्रता खोलेको छ । एजेन्सी
