राजेश पायल राईले बलिउड हस्ती सलमानसँगै टुुडिखेल तताउने
काठमाडौं, १० फागुन : ओडिसी इन्टरटेनमेन्टले आयोजना गर्न लागेको ‘दबङ्गः द सलमान खान लाइभ इन नेपाल’ नामक कार्यक्रममा बलिउड कलाकारसँगै नेपालका चर्चित गायक राजेश पायल राईले प्रस्तुती दिने भएका छन् ।
फागुन २६ गते राजधानीको टुँडिखेलमा हुने उक्त कार्यक्रममा उनले गायक राईले स्टेज शेयर गर्ने भएका हुन् । उसै पनि स्टेज तताउन सक्ने खुवी भएका गायकले आफ्ना चर्चित गीतहरु गाउने जनाइएको छ । भर्सस्टाइल गायकका रुपमा चिनिएका राजेश पायलको यो प्रस्तुती नेपाली गीत–संगीत भारतीय कलाकारहरुलाई सुन्ने र बुझ्ने मौकाको रुपमा आयोजकले लिएको छ । कार्यक्रममा नायिका सुष्मा कार्की र माला लिम्बूले पनि सलमान खानसँग नाच्ने भएका छन् ।
नायिका प्रियंका कार्की , स्वस्तिमा खड्का र अलिसा राईले सलमानसँग हिन्दी गीतमा कोरस नाच्नु पर्ने आयोजकको प्रस्ताव शैली अपमानजनक भएको भन्दै कार्यक्रम सहभागिता अस्वीकार गरेका थिए । उसै त कोरस नाच्नु पर्ने त्यसमाथि पारिश्रमिक समेत चित्तबुझ्दो नभएको भन्दै प्रियंका कार्की , स्वस्तिमा र अलिसा राईले अफर अस्वीकार गरेका थिए भने हाल तय भएका कलाकारहरुको पारिश्रमिक भने खुलेको छैन । नेपाल आउन लागेका नायक सलमानसँगै भारतीय नायिका सोनाक्षी सिन्हा, निर्देशक प्रभु देवा, डेजी शाह, कृति सेनोन र ‘मिट ब्रदर्स’ को पनि प्रस्तुती रहने आयोजकले जनाएका छन् ।
नेपाली साँगीतिक क्षेत्रमा ‘राई इज किङ’ का रूपमा परिचित गायक राजेशपायल राई विदेशी भूमिमा केहि समयअघि सम्मान पाएका थिए । सांगीतिक कार्यक्रमका लागि ‘वल्र्ड टुर’ का क्रममा न्यूजिल्याण्ड पुगेका राईलाई क्रिष्टचर्च सिटीकी मेयर लिआनी डेजाइलले सम्मान गरेकी थिइन् । यसअघि सांगीतिक यात्राकै क्रममा अमेरिकाका रोचेस्टर सिटीले गायक राईलाई सम्मान गरेका थियो ।
सिटीका मेयर लभ्ली बारेन र डाइरेक्टर डेपुटी मेयर डा. केर्डिक एल. अलेक्जन्डरले संयुक्त रूपमा सम्मानित गरेका थिए । राईले नेपाली भाषा, संस्कृति र संगीतलाई विश्वमा प्रचार गरिरहेका छन् । उनले नेपाली बाहेक दर्जनौं भाषामा गीत गाएका छन् । कुनै नेपाली गायक नगएको देश स्पेनको म्याड्रिड, नाइजेरियाको लेगोसमा पुगेर गीत गाएका छन् । राईले अफ्रिकी मुलुक नाइजेरियामा सांस्कृतिक कार्यक्रममा नेपाली गीत गाएका छन् ।