संकटालाई आहा रारा गोल्डकपको उपाधि
पोखरा, २८ चैत । १९ औं संस्करणको आहा ! रारा गोल्डकपको उपाधि संकटा क्लबले जितेको छ । शनिबार पोखरा रंगशालामा भएको फाइनलमा पेनाल्टीमा अफ्रिकन रुट्स एसोसिएसनलाई ४–२ ले हराउँदै संकटाले उपाधि जितेको हो । खेलको ११ औं मिनेटमा अफ्रिकन रुट्सका बासेकले पहिलो गोल गरेका थिए । दोस्रो हाफमा संकटाले बराबरी गोल फर्काएको थियो । ५१ औं मिनेटमा संकटाका ग्लोरीले बराबरी फर्काए ।
फाइनल जितेको टोलीले नगद १० लाख १ हजार र उपविजेताले नगद ५ लाख १ हजार रूपैयाँ पुरस्कार पाएको छ । अफ्रिकन रुट्स पहिलो सहभागितामै फाइनल पुगेको थियो ।
अफ्रिकन रुट्सले दोस्रो सेमिफाइनलमा नेपाल पुलिस क्लबलाई २–० ले हराउँदै फाइनलमा संकटासँग खेल्ने पक्का गरेको थियो । प्रतियोगितामा यसअघि पाँच संस्करण खेलिसकेको संकटा पहिलोपटक फाइनल प्रवेश गरेको थियो । संकटाले पहिलो सेमिफाइनलमा एपीएफलाई २–० ले हराएर फाइनल पुगेको थियो । प्रतियोगितामा फाइनल खेलेका दुईसहित मनाङ मर्स्याङदी, नेपाल पुलिस, थ्री स्टार, एपीएफ, सहारा, मछिन्द्र क्लबको सहभागिता थियो ।