झन् ठूलो भिडमा नेपाली
खोप लगाउन अस्पतालमा भिड, गाउँ फर्कन बसपार्कमा भिड, विदेश जान पिसिआर गर्नेको भिड
काठमाडौं, १५ बैसाख । सरकारले निषेधाज्ञा लागू गर्ने घोषणा गरेपछि काठमाडाैंबाट घर बाहिरिनेको संख्या अत्यधिक बढेको छ । बिहीबारबाट निषेधाज्ञा लागू गर्ने घोषणा भएसँगै यात्रुबाहक सवारीसाधनमा सिट संख्याभन्दा बढी यात्रु घर फर्किरहेका छन् ।
निषेधाज्ञापछि उद्योग–व्यवसाय बन्द हुने, रोजगारी गुम्ने र जीवन जटिल हुने डरले ठूलो संख्यामा मजदुरहरू गाउँ फर्किएका छन् । गत वर्ष पनि लकडाउन अघि गाडी र पछि पैदल गरी १२ लाख यात्रु जिल्ला फर्किएका थिए । यसपालि पनि पछिल्लो दुई दिनमा मात्रै ७७ हजार यात्रु घर फर्किएका छन् । फर्कनेमा मजदुरमात्र होइन, उच्च शिक्षा पढ्न काठमाडौं आएकाहरू पनि छन् ।
काठमाडौंको गोंगबु बसपार्क, कलंकी र जडीबुटी, कोटेश्वर र भक्तपुर क्षेत्रमा अधिक भिड देखिएको महानगरीय ट्राफिक प्रहरी महाशाखाका प्रवक्ता प्रहरी उपरीक्षक श्यामकृष्ण अधिकारीले बताए । नाकाहरूमा ट्राफिक प्रहरीले सवारी जाँच बढाएको छ । सिट क्षमताभन्दा धेरै यात्रु राख्ने, मास्क नलगाउनेलाई कारबाही भइरहेको ट्राफिक प्रहरीको भनाइ छ । तर, गाडी अभावमा यात्रुहरू कोचाकोच गरेर फर्किएका छन् ।
सामान्यतया औसतमा दैनिक काठमाडौं उपत्यकामा भित्रिने र बाहिरिने सवारीसाधनको संख्या ७–७ हजारको हाराहारीमा हुन्छ । त्यस्तै, दैनिक औसतमा ४० हजार मानिस आउने र त्यति नै संख्या बाहिरिने गरेका छन् । तर, सोमबार बिहान ५ बजेदेखि मंगलबार बिहान ५ बजेसम्म २४ घन्टामा ५० हजारभन्दा धेरै मानिस बाहिरिएका छन् ।
भित्रिने नियमित संख्यामा भने परिवर्तन आएको छैन । त्यसैगरी, मंगलबार बिहानदेखि साँझसम्म १२ घन्टामा २७ हजार ७८० यात्रु फर्किएको छ र २४ घन्टामा यो संख्या ६० हजार यात्रु बाहिरिने महानगरीय ट्राफिक प्रहरी महाशाखाका भनाइ छ । ‘लामो दूरीका सवारीसाधन रातमा धेरै चल्ने भएकाले बुधबार बिहानसम्ममा बाहिरिनेको संख्या निकै बढ्ने अनुमान छ,’ महाशाखाका प्रहरी हवल्दार नवराज अधिकारी भने ।
सवारी लाइसेन्सको अनलाइन आवेदन स्थगित
यातायात व्यवस्था विभागले सवारीचालक अनुमतिपत्र (लाइसेन्स) को अनलाइन आवेदन अनिश्चितकालका लागि बन्द गरेको छ । विश्वभर फैलिरहेको कोभिड–१९ को नयाँ भेरियन्टका कारण बिहीबार (१६ वैशाख, ०७८) देखि अनिश्चितकालसम्मका लागि बन्द भएको हो ।
‘बिहीबारदेखि अर्को सूचना प्रकाशन नभएसम्मका लागि सवारीचालक अनुमतिपत्रको अनलाइन आवेदन प्रणाली बन्द रहनेछ,’ विभागले जारी गरेको सूचनामा उल्लेख छ । सवारी लाइसेन्सको अनलाइन आवेदनसँगै स्मार्ट लाइसेन्स वितरण र इम्बोस्ड नम्बरप्लेट जडान कार्यालयहरू पनि बिहीबारदेखि बन्द हुनेछन् । सवारीचालक अनुमतिपत्रको प्रयोगात्मक परीक्षा (ट्रायल) भने बुधबार पनि सञ्चालन हुनेछ । ‘बिहीबारदेखि अवस्था सहज नहुन्जेलका लागि बन्द गरिनेछ,’ यातायात व्यवस्था विभागका महानिर्देशक नमराज घिमिरेले भने ।
उड्ने र गुड्ने साधनलाई विभेद नगर्न व्यवसायीको माग
हवाई यातायातलाई सञ्चालन गर्न दिने, तर सडक सवारी यातायातलाई रोक्ने सरकारको निर्णयमा यातायात व्यवसायीले तीव्र असन्तुष्टि देखाएका छन् । ‘उड्ने र गुड्ने सवारीसाधनलाई विभेद नगर्न सरकारसँग जोडदार माग गर्छौँ,’ नेपाल राष्ट्रिय यातायात व्यवसायी महासंघका अध्यक्ष योगेन्द्रनाथ कर्माचार्यले भने ।
स्वास्थ्य सुरक्षा अपनाउने विषयलाई कडाइ गरेर सडक यातायातलाई पनि सुचारु राख्नुपर्ने व्यवसायीको माग छ । ‘आन्तरिक हवाईजहाजले पालना गर्ने सर्बै मापदण्ड पूरा गर्न तयार रहेका छौँ,’ महासंघका महासचिव सरोज सिटौलाले भने । तोकिएको सिटभन्दा बढी नचडाउने र सरकारले तोकेको सबै मापदण्डलाई पालना गरिने उनको भनाइ छ ।
लामो दूरीका सवारीसाधन सञ्चालनका लागि प्रधानमन्त्री कार्यालयदेखि गृह र यातायात मन्त्रालयसम्म सुझाब दिएको जानकारी दिए । सर्वसाधारण चढ्ने साधनलाई भने हेपिएको र धनी मानिस चढ्ने हवाई यातायातलाई भने सञ्चालन गरेर अन्याय गरेको बताए । कि त सबै प्रकारका यातायातलाई बन्द गर्नुपर्ने कि त सबैलाई मापदण्ड पूरा गरेर सञ्चालन गर्नुपर्ने उनीहरूको भनाइ छ । यही निर्णयमा सरकार रहने हो भने निर्णयको उल्लंघन हुने महासचिव सिटौलाले भने ।
नेपाल ट्रान्जिट बनाउन प्रतिबन्ध, अब भारतीयहरू नेपालको बाटो साउदी जान नपाउने
सरकारले तेस्रो मुलुकको यात्रा गर्ने उद्देश्यसहित त्रिभुवन अन्तर्राष्ट्रिय विमानस्थललाई ट्रान्जिट बनाउने विदेशी नागरिकको आवागमनमा रोक लगाएको छ । अध्यागमन विभागले सोमबार सूचना जारी गर्दै कोरोनाको नयाँ भेरियन्ट फैलिएका कारण बुधबार (१५ वैशाख) राति १२ बजेबाट अर्को सूचना जारी नभएसम्मका लागि प्रतिबन्ध लगाएको जनाएको छ ।
विभागले नेपाललाई अन्तिम गन्तव्य बनाएर आउने र नेपालबाट बाहिरिने यात्रुले पाउँदै आएको सेवा भने नियमित रहने जनाएको छ । भारतमा कोरोना भाइरसको दोस्रो लहरले हरेक दिन रेकर्ड तोडिरहेको वेला नयाँदिल्लीबाट नेपालमा सीधा उडानबाट दैनिक सयौँ भारतीय विनारोकतोक भित्रिरहेका थिए ।
नेपाल घुम्न आएका विदेशीभन्दा पनि भारतबाट साउदीतर्फ सीधा उडान रोकिएपछि साउदीमा काम गर्ने भारतीय नेपालको बाटोबाट साउदीतर्फ गइरहेका छन् । नेपालमा आउँदा क्वारेन्टिन र स्वास्थ्य मापदण्डमा लापरबाही गर्दा नेपालसमेत उच्च जोखिममा परेको भन्दै विरोध भइरहेको थियो । नेपालमा एयर इन्डिया र नेपाल वायुसेवा निगमले दैनिक एक–एक उडान गरिरहेका छन् । दुवै उडानमा ८० प्रतिशतभन्दा बढी भारतीयले भरिने गरेका छन् ।
कोरोना भाइरस संक्रमणको जोखिम बढेको भन्दै साउदी अरबले फेब्रुवरी पहिलो सातादेखि भारतलगायत २० देशबाट हुने सीधा उडान रोकेपछि भारतीयले नेपालको बाटो रोजेका थिए । नयाँ पत्रिका दैनिकबाट
