वरिष्ठ चलचित्रकर्मी एवं लेखक चेतन कार्कीकाे निधन
काठमाडौं, २ जेठ । वरिष्ठ चलचित्रकर्मी एवं लेखक चेतन कार्कीको निधन भएको छ । कार्कीको उपचारका क्रममा काठमाडौंको छाउनीस्थित सैनिक अस्पतालमा आइतबार बिहान ज्यान गएको हो ।
गएको १६ गते देहरादुनबाट काठमाडौं आएका उनलाई ज्वरो आएपछि अस्पतालमा भर्ना गरिएको थियो । कोरोना भाइरसबाट संक्रमित भएपछि उनको एक हप्तादेखि सैनिक अस्पतालमा उपचार भइरहेको थियो । चलचित्रको लेखन तथा निर्देशनसहित, गीत, कविता, कथा तथा उपन्यास लेखनमा सक्रिय कार्कीको ८३ वर्षको उमेरमा निधन भएको हो ।
स्याङ्जाको बहाँटारी, थुमआरुखर्कमा विस १९९५ साल कात्तिक २२ गते जन्मिएका कार्कीको तिजको रहर आयो बरिलै, बुझ्नै सकिनौं तिमीले मेरो आँखाको भाका, माया पिरतीको चोखो कथा, यी ओठ तिम्रा, बैनीको दया छ भने सहितका दर्जनौं लोक, आधुनिक तथा चलचित्रका गीतहरु लोकप्रिय छन् । कार्कीले २०७६ मा आफ्नो ८२ औं जन्मोत्सवको उपलक्षमा एकल कविता वाचन पनि गरेका थिए ।
उनका गीत नारायण गोपाल, तारा देवी, अरुणा लामा, प्रकाश श्रेष्ठ, किरण प्रधानलगायतका गायक गायिकाले गाएका छन् । विसं २०२५ सालमा परिवर्तन चलचित्रको पटकथा संवाद लेखनबाट उनले नेपाली चलचित्रमा प्रवेश गरेका थिए । उनका श्रीमती र दुई छोरा छन् ।