भगवान भ्रम
करियाहरूले
तिमीलाई भगवान् बनाए
आरती उतारे
आराधना गरे
जयजयकार गरे ।
गुलामहरूले
तिमीलाई अधिपति माने
बढाइचढाइ गरे
पाउ मिचे
चाकरी गरे ।
हनुमानहरुले
तिमीलाई राम अर्थ्याए
छातीमा फोटो टाँसे
काँधमा हालेर पापको सुमेरु घुमाए ।
बेलाबखत दासहरूले
रावणलाई राम बनाउँदो रहेछ
तर, राम आफ्नै कारणले रावण बन्दो रहेछ ।
आक्कलझुक्कल पराश्रयीहरूले
दानवलाई, देवी बनाउँदो रहेछ
तर, देवी, आफ्नै कारणले दानव हुँदो रहेछ ।
परिचारकहरूले
राम भनाएर, राम हुँदैन रावण
भक्तहरूले
देवी कहलाएर, देवी कहलिँदैन दानव
आराधकहरूले
भगवान् बनाएर, भगवान् बन्दैन मानव ।
।।
८ जेठ २०७८