थपिने भन्दा निको हुने दोब्बर
काठमाडौं, २२ जेठ । विगत दुई सातायता दैनिक थपिने सङ्क्रमितको संख्यालाई निको हुनेको सङ्ख्याले उछिनेको छ । लगातार १४ औं दिन शुक्रबार आठ हजार ६६३ जना कोरोना सङ्क्रमण मुक्त भएका छन् भने नयाँ थपिएका सङ्क्रमितको संख्या चार हजार ६२४ रहेको छ ।
हालसम्म पाँच लाख ८१ हजार ५६० जनामा कोरोना सङ्क्रमण पुष्टि भएकोमा चार लाख ७६ हजार १३० जना निको भइसकेका छन् ।
३१ लाख २१ हजार १२० जनाको पीसीआर परीक्षण गरिएको छ । अहिले निको हुने दर ८१.९ प्रतिशत छ ।
यो दर अफगानिस्तान, भुटान, माल्दिभ्स् र श्रीलङ्काभन्दा बढी हो भने बङ्गलादेश, भारत र पाकिस्तानभन्दा कम हो । बङ्गलादेश र भारतको निको हुने दर ९२.५ र पाकिस्तानको ९१.८ प्रतिशत छ । गोरखापत्र दैनिकबाट
