पोखरेललाई मुख्यमन्त्री प्रस्ताव गर्न मनाङेसहित वहुमत विपक्षी सांसद पुगे प्रदेश प्रमुख कार्यालय


प्रकाशित मिति : June 11, 2021

पोखरा, २८ जेठ । नयाँ सरकार गठनको दाबीसहित गण्डकी प्रदेशमा दीपक मनाङ्गेसहित विपक्षी गठबन्धनका ३१ सांसद प्रदेश प्रमुखको कार्यालयमा पुगेका छन् । स्वतन्त्र सांसद दीपक मनाङेसहित कांग्रेसका १५, माओवादी केन्द्रका ११, राष्ट्रिय जनमोर्चाका दुई, जनता समाजवादी पार्टीका दुई सांसद रहेका छन् ।

प्रदेश प्रमुखले संविधानको धारा १६८ (५) बमोजिम सरकार गठनका लागि २४ घण्टाको समय दिएर आह्वान गरेपछि उनीहरू बहुमत सदस्यसहित प्रदेश प्रमुख सीता पौडेलको कार्यालयमा उपस्थित भएका हुन् । प्रदेश प्रमुख पौडेलले मुख्यमन्त्री पदमा दाबी गर्न भोलि शनिबार ३ बजेसम्मको २४ घण्टे समय दिएकी छन् ।

उनले सो पदमा दाबी गर्न आज आह्वान गरेको केहि घण्टाभित्रै विपक्षी गठबन्धनले सो पदमा नेपाली कांग्रेस संसदीय दलका नेता कृष्णचन्द्र पोखरेल नेपालीलाई उम्मेदवारको रुपमा अघि सारेको छ । विपक्षी गठबन्धनका सांसद प्रदेश सभाहलमा जम्मा भई एक–एक सांसद गनेर सँगसँगै प्रदेश प्रमुखको कार्यालयमा पुगेका हुन् ।

६० सदस्यीय प्रदेश सभाका बहुमत सदस्य उनको पक्षमा देखिएका छन् । मुख्यमन्त्री पृथ्वीसुब्बा गुरुङले विश्वासको मत पाउँ भन्ने प्रस्तावमाथि बिहीबार प्रदेश सभामा मतदान भएको थियो । गुरुङको प्रस्तावमा बहुमत प्राप्त नभएपछि उनी स्वतः पदमुक्त भएका छन् । त्यसपछि नयाँ मुख्यमन्त्री चयन प्रक्रिया शुरु भएको हो ।

प्रतिक्रिया दिनुहोस्