सरकारको विरोध गर्नेविरुद्ध प्रतिवादमा उत्रिन मन्त्रीहरुलाई प्रधानमन्त्रीको निर्देशन
‘चुरे संरक्षणका लागि ठोस योजनाका साथ लाग्या छौं’
काठमाडौं, ३ असार । प्रधानमन्त्री केपी शर्मा ओलीले सरकारको कुप्रचार गर्नेहरुविरुद्ध प्रतिवादमा उत्रिन मन्त्रीहरुलाई निर्देशन दिएका छन् ।
प्रधानमन्त्री ओलीले बिहीबार राष्ट्रिय विपद् जोखिम न्यूनीकरण तथा व्यवस्थापन राष्ट्रिय परिषद्को छैटौं बैठकलाई सम्बोधन गर्दै सरकारका विरुद्धमा विरोधीहरुले कुप्रचार गरेको भन्दै त्यसको प्रतिवादमा उत्रिन मन्त्रीहरुलाई निर्देशन दिएका हुन् ।
विरोधीहरु आक्रमक ढंगले प्रस्तुत भएको भन्दै उनले सरकारको कामको प्रचारप्रसार गर्न र विरोधीको खण्डन गर्न आग्रह गरे । ‘हरेक मन्त्रीहरुलाई सरकारको कामको प्रचार गर्न र विरोधीको खण्डन गर्न र आफ्ना काम र उपलब्धिहरुको डिफेन्ड गर्न अनुरोध छ,’ उनले भने ।
उनले यस वर्ष अघिल्ला वर्षहरुमा जस्तो तराई डुबानमा नपर्ने पनि दावी गरे । नेपाल–भारत सीमा क्षेत्रमा लगाएको बाँध पहिले खुला नछोडिने गरेका कारण डुबान भएको भन्दै उनले यस वर्ष बाँध खोलिएको बताएका छन् ।
बाँधका कारण नेपाली भूमि डुबानमा पर्ने विषयमा सर्वे गर्न संयुक्त टोली आवश्यक रहेको र त्यस निम्ति काम गर्न पनि प्रधानमन्त्री ओलीले निर्देशन दिए । ‘जुन डुबान क्षेत्रहरु हो, त्यहाँ हामीले अलिकति खोलेका छौं । अरु ठाउँहरुमा पनि खोल्दै जानु आवश्यक छ । यसका निम्ति संयुक्त टोलीले सर्भे गर्ने, संयुक्त टोलीले निर्णय गर्ने र संयुक्त टोलीलाई खटाउनुपर्ने यही बेला हो । सीमावर्ती क्षेत्रका बाँध, जसबाट नेपालको भूमि डुबानमा परेको छ, त्यो कुरा संयुक्त टोलीले हेर्ने विषयतर्फ कार्य गर्न सक्छौं’, उनले भने ।
प्रधानमन्त्री ओलीले सरकारले चुरे दोहन गर्न नखोजेको पनि स्पष्ट पारे । सरकार चुरेको संरक्षणका लागि ठोस योजनाका साथ लागेको पनि उनले बताए । उनले भने, ‘हामीले चुरे दोहन नहोस् भन्नका लागि बजेटमा चुरे दोहन नगर्ने, चुरेको दोहनलाई रोक्ने, त्यहाँबाट ढुंगा, बालुवा, गिट्टी आदि निकाल्ने काम रोक्ने, खानी पत्ता लगाउने, त्यो खानी उपयुक्त छ कि छैन वातावरणीय सर्भे गर्ने, वातावरण अनुकूल हुन्छ कि हुँदैन वातावरणीय सर्भे गरेर अनि मात्रै खानीबाट गिट्टी, बालुवा निकाल्ने । बढी भयो भनेदेखि त हामीले बिक्री पनि गरेर व्यापार पनि गर्न सक्छौं त्यसमा भन्ने कुरा हो । त्यो कुनै अनौठो कुरा होइन । हामीले चुरेको संरक्षण गर्न खोजेको । हामी चुरे विनाश होइन, चुरेको संरक्षण गर्न लागि पर्या छौं । चुरेको संरक्षण गरिन्छ । ठोस योजनाका साथ हामी लाग्या छौं ।’ उनले अहिले नयाँ बाटो बनाउने काम जोखिमयुक्त भएकाले भदौसम्म नयाँ बाटो खन्ने तथा पहाडहरु भत्काउने काम रोक्नुपर्ने पनि बताए ।
