पार्टी एकतामा प्रयत्नशील छौं, आशा मारेका छैनौं : प्रदीप ज्ञवाली
काठमाडौं, १३ असार । सत्तारुढ नेकपा एमालेका प्रवक्ता प्रदीप ज्ञवालीले पार्टी एकताका लागि आफूहरु प्रयत्नशील रहेको बताएका छन् ।
आज (आइतबार) बालुवाटारमा बसेको स्थायी कमिटी बैठकपछि उनले नेता माधवकुमार नेपालसहितको एमाले बनाउन औपचारिक–अनौपचारिक छलफल भइरहेको जानकारी दिएका छन् ।
एमाले अक्षुण्ण राख्नका लागि प्रयास भइरहेको उनले उल्लेख गरे । प्रवक्ता ज्ञवालीले प्रधानमन्त्री तथा अध्यक्ष केपी शर्मा ओलीले गरेको आह्वानमा केन्द्रित रहेर छलफल पनि गरिरहेको दाबी गरे । सीमित नेताहरुको चाहना र जनताको चाहना मेल नखाएको उनको भनाइ छ ।
‘जनताका चाहनाअनुसार उहाँहरुको क्रियाकलाप मेल खाइरहेका छैनन् । जनस्तरबाट पनि गम्भीर टीकाटिप्पणी भइरहेको छ । हामी प्रयत्नशील छौं । आशा मारेका छैनौं । तर, नेताहरु के गर्नुहुन्छ, आन्दोलन र राजनीतिक जीवनलाई कुन बाटोमा लैजानु हुन्छ, त्यो चाहिं भविष्यले बताउँला ।’
