निवेदकका पक्षमा फैसला आए बहुदलीय व्यवस्था अन्त्य हुन्छ : महान्यायाधिवक्ता
काठमाडौं, १४ असार । महान्यायाधिवक्ता रमेश बडालले सर्वोच्च अदालतमा दायर भएको रिट निवेदकका पक्षमा फैसला आए बहुदलीय व्यवस्थाको अन्त्य हुने तर्क गरेका छन् ।
सर्वोच्च अदालतमा विपक्षका तर्फबाट बहसमा भाग लिँदै उनले यस्तो जिकिर गरेका हुन् । उनले भने, ‘यो रिटको माग सम्बोधन गरियो भने बहुलबाद त समाप्त हुन्छ नै बहुदलीय व्यवस्थाको पनि अन्त्य हुन्छ ।’
महान्यायाधिवक्ता बडालले संसद विघटनसम्बन्धी मुद्दा संवैधानिक इजलासको क्षेत्राधिकार भित्र नपर्ने बताएका छन् । संविधानको धारा १३७ अनुसार यो मुद्दा संवैधानिक इजलासमा आउनका लागि संघ र प्रदेश बीचको विवाद वा संघ र स्थानीय तह बीचको विवाद भएको हुनुपर्ने उनको तर्क छ ।
संसद विघटनविरुद्ध दायर रिटमा सोमबार विपक्षीको तर्फबाट बहस शुरु गर्दै महान्याधिवक्ता बडालले भने, ‘तर, दुर्भाग्य उहाँहरु जुन धारा टेकेर यहाँ आउनुभयो त्यो धारा अनुसारको माग दावी नै छैन । अदालतलाई गुमराहमा पार्नुभयो । १३७ (३) बमोजिम प्रधान न्यायाधीशबाट कुनै आदेश भएको छैन । अरु इजलासमा पेश भएको मुद्दा यो इजलासमा आउने बाटो भनेको १३७ (३) हो तर, त्यो बाटोबाट यो इजलासमा मुद्दा आएको छैन ।’
‘अधिकार क्षेत्र नै नभएको अवस्थामा कसरी न्यायिक निर्णय गर्न मिल्छ ?’ उनले प्रश्न गरे । रिटमा भएको चार दिनको बहस गाली पुराण भएको उनले उल्लेख गरे । गालीको जवाफ गालीबाट दिन नमिल्ने हुनाले बहसबाट दिने उनले बताए ।
गत जेठ ७ गते सरकारको सिफारिसमा राष्ट्रपति विद्यादेवी भण्डारीले प्रतिनिधिसभा विघटन गर्दै आगामी कात्तिक २६ र मंसिर ३ गते मध्यावधि निर्वाचन घोषणा गरेकी थिइन् । यो कदम असंवैधानिक भएको जिकीर गर्दै सर्वोच्च अदालतमा ३० वटा रिट परेका छन् । ती रिटहरुमाथि यही असार ९ गतेदेखि निरन्तर बहस हुँदै आएको छ ।
