जङ्गली हात्ती गाउँ छिरेपछि स्थानीय आतंकित, दुई घर भत्कायो
रौतहट, १९ असार । रौतहटको चार गाउँमा जङ्गली हाती पसेपछि स्थानीय आतंकित बनेका छन् । शनिबार बिहान जङ्गलबाट करिब ३० किलोमिटर दक्षिणको गरुडा नगरपालिकाको शिवनगर, देवाहीगोनाही नगरपालिकाको उचिडिह र माधवनारायण नगरपालिकाको सखुअवा र मिठुअवासहितको गाउँमा जङ्गली हात्तीको प्रवेश गरेपछि स्थानीय आतंकित बनेका हुन् ।
हात्ती नियन्त्रणमा लिन चितवन राष्ट्रिय निकुञ्ज, पर्सा राष्ट्रिय निकुञ्ज र डिभिजन वन कार्यालय र प्रहरीको संयुक्त टोली खटिए पनि नियन्त्रणमा लिन सकिएको छैन ।
जङ्गली हात्तीले गरुडा नगरपालिकाको शिवनगर र माधवनारायण नगरपालिको मिठुअवामा दुई घर भत्काएको छ । स्थानीयको धानको भकारी जङ्गली हात्तीले भत्काएको छ । अविरल वर्षा भएसँगै जङ्गली हाती गाउँ पसेको हो ।
