इराकको बग्दादस्थित अमेरिकी दूतावासमा तीन रकेट र ड्रोन बम आक्रमण
काठमाडौं, २४ असार । इराकको राजधानी बग्दादस्थित अमेरिकी दूतावfसमा बिहीबार तीन वटा रकेट र ड्रोन बम आक्रमण भएको छ । एएफपीका अनुसार अमेरिकी दूतावासमा रकेट र ड्रोन आक्रमण भएको विषय इराकी सेनाले पुष्टि गरेका छन् ।
रोयटर्सका अनुसार पछिल्लो २४ घण्टाको अवधिमा अमेरिकी दूतावास लक्षित आक्रमणहरु भएका हुन् । यद्यपी सबै आक्रमणको प्रयास दूतावासको एन्टी मिसाइल प्रणालीले असफल बनाएको समाचारमा जनाइएको छ ।
दूतावासमा मात्र नभएर ग्रिन जोन क्षेत्रमा पनि आक्रमण भएको बताइएको छ । कसले आक्रमण गरेको भनेर केही खुलाइएको छैन । यद्यपी इरानको समर्थन प्राप्त लडाकुहरुले यो आक्रमण गरेको अनुमान लगाइएको छ ।
इरान र अमेरिकाबीच युरेनियम प्रशोधनको विषयमा विवाद छ भने गत वर्ष अमेरिकाले इरानकी सैन्य कमाण्डर कासिम सुलेमानीलाई आतंकवादी भन्दै ड्रोन आक्रमण गरेर मारिदिएको थियो । खबरकाअनुसार इराकमा २५ सय अमेरिकी सेना तैनाथ छन् । उनीहरुमाथि यस वर्ष हालसम्म ५० पटकभन्दा बढी आक्रमण भइसकेको छ । एजेन्सी
