सन्दिप लामिछाने ‘प्लेयर्स टु वाच’ को सूचीमा
काठमाण्डौं, १७ फागुन : सन्दिप लामिछाने विश्वकप छनोट क्रिकेट प्रतियोगिताको ‘प्लेयर्स टु वाच’ को सूचीमा परेका छन् । अन्तर्रा्ष्ट्रिय क्रिकेट परिषद् (आइसीसी) ले आइतबारबाट जिम्बावेमा हुने प्रतियोगिताका लागि ८ राष्ट्रका १० खेलाडीलाई ‘स्टार’ को सूचीमा राखेको हो । जहाँ नेपालका सन्दिप पनि समावेश भएका छन् ।
‘प्लेयर्स टु वाच’ का रुपमा रहेका स्टार खेलाडीको रुपमा सन्दिपलाई प्रस्तुत गर्दै आइसीसीले लेखेको छ, ‘१९ वर्षीय लेग स्पिनर सन्दिपले आफ्नो प्रतिभाबाट विश्वलाई चकित पारेका छन् । साथै उनी इण्डियन प्रिमियर लिग (आइपीएल) खेल्ने पहिलो नेपाली खेलाडी पनि बनिसकेका छन् ।’ नामिबियामा सम्पन्न डिभिजन २ मा सन्दिप म्यान अफ द सिरिज भएका थिए । १७ विकेट लिएका सन्दीपले दुई खेलमा म्यान अफ द म्याच प्रदर्शन पनि गरेका थिए ।
सन्दिपलाई आइपीएलमा दिल्ली डेयरडेभिल्सले खरिद गरेको समाचारलाई महत्व दिंदै तत्कालीन प्रधानमन्त्री शेरबहदुर देउवाले ट्वीटरमा सन्दिपलाई लिएर पूरा देश गौरवाम्वित भएको उल्लेख गरेको आइसीसीले लेखेको छ । बलमाथि सन्दिपको पकड, चलाखीपूर्ण बलिङ तथा बल टर्न गर्नसक्ने क्षमताले उनलाई खतरनाक बलर बनाएको आइसीसीले उल्लेख गरेको छ ।