थप ३,१०६ जनामा कोरोना संक्रमण, १,९१६ जना निको, २३ को मृत्यु
काठमाडौं, १६ साउन । नेपालमा पछिल्लो २४ घण्टामा थप ३,१०६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार ९,२६३ जनामा गरिएको पीसीआर परीक्षणमा २,२८० र ४,२५६ जनामा गरिएको एन्टिजेन परीक्षणमा ८२६ जना गरी ३,१०६ जनामा संक्रमण पुष्टि भएको हो ।
काठमाडौं उपत्यकामा पछिल्लो २४ घण्टामा ७७५ जनामा कोरोना संक्रमण पुष्टि भएको छ । पछिल्लो २४ घण्टामा थपिएका संक्रमितमा काठमाडौंमा मात्रै ५१७ जना छन् । यस्तै, ललितपुरमा १६४ र भक्तपुरमा ९४ संक्रमित थपिएका हुन् । पछिल्लो २४ घण्टामा कोरोना संक्रमणका कारण २३ जनाको मृत्यु भएको छ भने १,९१६ जना संक्रमणमुक्त भएका छन् ।
