कातिक २९ देखि ‘ए’ डिभिजन लिग : विजेताले ७५ लाख पाउने
काठमाडौं, १७ साउन । शहीद स्मारक ‘ए’ डिभिजन लिगको झण्डै दुई महिना पछि सरेको छ । यसअघि असोज ३ देखि हुने तय भएको प्रतियोगिता अब कात्तिक २९ अर्थात नोभेम्बर १५ देखि हुने भएको छ ।
आइतबार अखिल नेपाल फुटबल संघ (एन्फा) र क्लबहरुबीच भएको छलफलले प्रतियोगिता पछाडि सार्ने निर्णय गरेको हो । आउँदो अक्टोबरमा साफ च्याम्पियनसिप आयोजना गर्नुपर्ने भएपछि घरेलु लिग पछि सारिएको एन्फाले बताएको छ ।
बढाइयो पुरस्कार राशी
यस वर्ष लिग विजेताले ७५ लाख रुपैयाँ पाउने भएको छ । यसअघि विजेताले ५० लाख रुपैयाँ पाउने तय भए पनि आइतबारको बैठकले पुरस्कार राशी बढाउने निर्णय गरेको एन्फाका एक अधिकारीले जानकारी दिए ।
त्यस्तै उपवेजताले ५० लाख, तेस्रो हुनेले २५ लाख रुपैयाँ पाउनेछन् । लिग तयारीका लागि क्लबहरुलाई एन्फाले २० लाख रुपैयाँ दिनेछ । १४ क्लबबीच सिंगल राउन्ड रोविनमा हुने लिगको पुछारमा रहने दुई टिम बी डिभिजनमा घटुवा हुनेछ ।
