बुढानिलकण्ठमा कांग्रेस शीर्ष नेताको वैठक, क्रियाशील सदस्यता विवादबारे छलफल
काठमाडौं, २० साउन । सत्तारुढ नेपाली कांग्रेसको शीर्ष नेताहरुको बैठक आज (बुधबार) बस्दै छ । प्रधानमन्त्री समेत रहेका पार्टी सभापति शेरबहादुर देउवाको निजी निवास बूढानीलकण्ठमा शीर्ष नेताहरुको बैठक बस्न लागेको हो । बैठक दिउँसो २ बजेका लागि बोलाइएको छ । बैठकमा क्रियाशील सदस्यता विवादबारे छलफल हुने जनाइएको छ ।
साउन १४ गते बूढानीलकण्ठमा बसेको पदाधिकारी तथा पूर्वपदाधिकारी बैठकले विभिन्न जिल्लामा देखिएको क्रियाशील सदस्यता विवाद पाँच दिनभित्र टुंग्याउन शीर्ष नेताहरुलाई जिम्मेवारी दिएको थियो । पदाधिकारी र पूर्व पदाधिकारी बैठकले जिम्मेवारी दिएको एक दिनपछि बसेको शीर्ष नेताहरुको बैठकले मापदण्ड बनाएर क्रियाशील सदस्यता विवाद टुंग्याउने निष्कर्ष निकालेको थियो ।
बैठकमा सभापति देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलासँगै सहमहामन्त्री डा. प्रकाशशरण महत, केन्द्रीय सदस्य रमेश लेखक र डा. मिनेन्द्र रिजाल सहभागी हुनेछन् ।