उपचार गर्न आएका पुरुषलाई बलात्कार गरेको आरोपमा डाक्टर पक्राउ
धनकुटा, २६ साउन । उपचारका लागि आएका एक विरामी पुरुषलाई बलात्कार गरेको आरोपमा धनकुटाबाट एक डाक्टर पक्राउ परेका छन् ।
बिरामी पुरुषलाई यौनहिंसा गरेको आरोपमा धनकुटा–७ मा रहेको सुवास मेडिकलका सञ्चालक डा. राज शर्मालाई सोमबार पक्राउ गरिएको प्रहरीले जनाएको छ ।
पिसाबसम्बन्धी समस्याको उपचारका लागि गएका धनकुटा पाख्रिबासका ५३ वर्षीय पुरुषलाई बलात्कार गरेको आरोपमा शर्मालाई पक्राउ गरिएको जिल्ला प्रहरी कार्यालय धनकुटाका डीएसपी दीपककुमार रायले जानकारी दिए ।
‘बिरामीले आफूलाई शर्माले यौनहिंसा (बलात्कार) गरेको भन्दै उजुरी दिएपछि हामीले डा.शर्मालाई पक्राउ गरी अनुसन्धान शुरु गरेका छौँ,’ रायले भने । डा. शर्मा विराटनगर महानगरपालिका–१२ खरैयाका स्थायी बासिन्दा हुन् । राति साढे १० बजे मादक पदार्थ सेवन गरी बिरामी कक्षमा पुगेका शर्माले आफूलाई यौनहिंसा गरेको भन्दै पीडितले प्रहरीलाई उजुरी दिएका छन् ।
प्रारम्भिक अनुसन्धानबाट बिरामी पुरुषमाथि यौनहिंसा पुष्टि भएको प्रहरीको भनाई छ । तर, शर्माले भने आरोप अस्वीकार गरेका छन् । उनले बिरामीले आफूलाई अभद्र व्यवहार गरेको उल्टै आरोप लगाएका छन् । घटनाको विषयमा विस्तृत अनुसन्धान भइरहेको प्रहरीले जनाएको छ ।
