सेतीको कटानले डोटीका आठ गाउँ उच्च जोखिममा


२६ श्रावण २०७८, मंगलवार
badhi seti river

डोटी, २६ साउन । सेती नदीको बाढीले बर्षेनी कटान गर्दा डोटीका आठ वटा गाउँ उच्च जोखिममा पर्दै आएका छन् । नदी नियन्त्रणका लागि तारजालीको प्रयोग गरिए पनि कटान रोकिएको छैन ।

कटानले जिल्लाका बारपाटा, गोपघाट, कालागाढ, सिरखोलीसैन, दिपायल, घोलतडा तथा नारिदाङका बस्ती उच्च जोखिममा पर्दै आएका छन् । ती क्षेत्रमा बसोबास गर्ने नागरिक वर्षातकाे समयमा घरमा राम्रोसँग सुत्न समेत नसक्ने अवस्थामा रहेको स्थानीयवासीको गुनासो छ ।

जल उत्पन्न तथा प्रकोप नियन्त्रण कार्यालय दिपायल, राजपुरले नदी नियन्त्रणका लागि बर्षेनी लाखौं रकमका तारजाली लगाउने गरेको भए पनि समस्या समाधान हुन नसकेको दिपायल सिलगढी नगरपालिका–४, पिपल्लाका दीलबहादुर भण्डारीले बताए । उनले भने, ‘नदी नियन्त्रणका लागि जल उत्पन्न कार्यालयले लाखौंका तारजाली त हाल्छ, नदीको बाढीले असार–साउन महिनामै बगाउँछ, अनि जमिन फेरि कटान हुन सुरु गर्छ, हाम्रा पीडा उस्तै ।’

सेतीको बाढीले बर्षेनी आफ्नो धार परिर्वतन गर्दै बस्ती भएर बग्न थालेका कारण यहाँ बर्षेनी जोखिम बढ्दै गएको छ । पानीको बहाव पनि निकै बढ्ने भएकाले कति बेला बाढीले बगाउने हो भन्ने चिन्ताले पिरोल्ने गरेको दिपायल सिलगढी–१, सिरखोलीसैनका स्थानीयवासी लक्ष्मण साउदले बताए । जिल्लाको शिखर नगरपालिका–१०, बनलेग र ११, बारपाटामा बर्सेनि वर्षाको समयमा बाढी–पहिरोले निकै दुःख दिने गरेको स्थानीवासी बताउँछन् । सेतीमा पानीको बहाव बढेसँगै रातभर जाग्राम बस्नुपर्ने बाध्यता रहेको स्थानीयवासीको गुनासो छ ।

शिखर नगरपालिका–२, कालागाढका रामबहादुर कार्कीले दिपायल, बानीडुग्रीसैन, सिरखोलीसैन, कालागाढ, रामपुर, गेरुपानी, घोलतडा नारिदाङलगायत बस्तीमा जमिन नदीले कटान गर्न थालेको भए पनि सम्बन्धित निकायले रोकथामका लागि ठोस पहल नगर्दा समस्या हुन थालेको गुनासो गरे । उनले भने, ‘नदीले धार परिवर्तन गरेर दैनिक खेतबारी बगाउँदै आएको छ, रोकथामका लागि ठोस पहल भएको छैन ।’

यस वर्षको भारी वर्षातकै कारण जिल्लाका ग्रामीण क्षेत्रका एक दर्जन बढी सडक अवरुद्ध भएका छन् । जिल्लाका विभिन्न २२ ठाउँलाई प्रकोपको हिसाबले उच्च जोखिममा राखेर प्रतिसमुदायमा १२ जनालाई उद्धारकर्ताको तालिम र आवश्यक सामग्री दिई आधारभूत खोज तथा उद्धार सामग्री केन्द्र स्थापना गरिएको नेपाल रेडक्रस सोसाइटी सुदूरपश्चिम प्रदेशका महासचिव देवबहादुर बोहराले जानकारी दिए ।

जिल्लाको कति प्रतिशत भू–भाग पहिराको उच्च जोखिममा छ भन्ने यकिन तथ्यांक भने कुनै पनि निकायसँग छैन । जिल्लामा रहेका उच्च पहाडी तथा यसअघि हुँदै आएका दैवी प्रकोपका घटनाका आधारमा जोखिमयुक्त ठाउँ पहिचान गरिएको निमित्त प्रमुख जिल्ला अधिकारी मधुकृष्ण पौड्यालले जानकारी दिए ।

जिल्लामा वि.सं. २०७२ साउन २३ गते ठू्लो पानी पर्दा खसेको पहिरोका कारण सायल गाउँपालिका–४, बावनसेनमा एकै परिवारका पाँचसहित ६ जनाको ज्यान गएको थियो भने सयौं रोपनी खेतीयोग्य जमिन, पशुचौपाया बाढीले बगाएको थियो । यस वर्ष बाढी–पहिरोका कारण साउनसम्म पाँच जनाको ज्यान गइसकेको प्रहरीले जनाएको छ ।

प्रतिक्रिया
  • प्रधान सम्पादक
  • राजेश राई
  • कार्यकारी सम्पादक
  • राजु शिवा
  • सूचना विभाग दर्ता नं.
  • १८०२/२०७६-७७