बस र ट्रक ठोक्किँदा एक जनाको गयो ज्यान, १२ जना घाइते
धादिङ, ३२ साउन । पृथ्वी राजमार्ग अन्तर्गत धादिङको बैरेनीमा गए राति बस र ट्रक आपसमा ठोक्किँदा एक जनाको ज्यान गएको छ । १२ जना घाइते भएका छन् ।
राति २ बजे बा ३ ख ४०१४ नम्बरको बस र भारतीय नम्बर प्लेटको ट्रक ठोक्किँदा सोलुखुम्बुको महाकुलुङ गाउँपालिका–३ की २७ वर्षकी रेनुका कुलुङको ज्यान गएको प्रहरीले जनाएको छ । उनको बिहान राष्ट्रिय ट्रमा सेन्टर काठमाडौंमा उपचारका क्रममा ज्यान गएको हो ।
यस्तै दुर्घटनामा बसका चालकसहित १२ जना घाइते भएका छन् । घाइते १२ जनामध्ये चार जनाको अवस्था गम्भीर छ । प्रहरीका अनुसार ९ जनाको राष्ट्रिय ट्रमा सेन्टरमा नै उपचार भइरहेको छ भने तीन जनाको गल्छीमा रहेको बुढीगण्डकी अस्पतालमा उपचार भइरहेको छ ।
