यी हुन् नेपाल आइडल सिजन–४ का निर्णायक
काठमाडौं, ४ भदौं । गायन रियालिटी शो ‘नेपाल आइडल सिजन–४’ मा निर्णायकको टुङ्गो लागेको छ । शम्भुजित बास्कोटा, सुगम पोखरेल र सुवानी मोक्तानलाई निर्णायकमा अनुबन्ध गरिएको छ ।
पहिलो सिजनदेखि तेस्रो सिजनसम्म न्ह्यू बज्राचार्य, कालीप्रसाद बास्कोटा र इन्दिरा जोशी निर्णायक रहेकोमा यो सिजनबाट नयाँ निर्णायक अनुवन्ध गरिएको हो । शोको होस्ट आशिफ साहले गर्नेछन् भने उनको को–होस्टमा रेश्मा घिमिरे रहने जनाइएको छ । यस्तै आइडलको डिजिटल अडिसन शुरु भएको छ । भदौ १ बाट डिजिटल अडिसन शुरु भएको हो । भदौ ३१ गतेसम्म अडिसन दिन सकिने जनाइएको छ ।
अडिसन दिन मोबाइल फोनको ‘प्ले स्टोर’ मा गएर एपिवानको एप्लिकेसन डाउनलोड गर्नुपर्नेछ । अडिसन ओपनमा गएर नेपाल आइडल क्लिक गरेर मागिएको विवरण भर्नुपर्नेछ । आफ्नो स्वरमा दुई वटा फरक विधाका गीत रेकर्ड गरेर अपलोड गर्नुपर्ने निर्माण पक्षले जनाएको छ । डिजिटल अडिसनमा पास भएकाहरुको फिजिकल अडिसन हुनेछ । डिजिटल अडिसनमा देश तथा विदेशमा रहेका नेपालीले सहभागी हुन पाउने जनाइएको छ ।
