उद्धारमा खटिएको अमेरिकी विमानमै अफगानी महिलाले जन्माइन् शिशु
काठमाडौं, ७ भदौं । अमेरिकाले उद्धार गरेकी एक अफगान महिलाले विमानमै शिशुलाई जन्म दिएकी छन् । उद्धार उडानका क्रममा अफगान महिलाले उडिरहेको विमानमै शिशुलाई जन्म दिएकी बीबीसीले जनाएको छ ।
सामाजिक सञ्जाल ट्वीटरमा यूएस एअर मोबीलीटी कमान्डले ती महिला आफ्नो परिवारसँग मध्यपूर्वबाट यात्रा गरिरहेका बेला प्रसव पीडा सुरु भएको जनाएको छ ।
उनको अवस्था जटिल हुँदै गएपछि विमानका कमान्डरले विमानमा हावाको चाप बढाउनका लागि उडानको उचाइ कम गर्ने निर्णय गरेका थिए । जसले ती सुत्केरी र उनको शिशुको ज्यान बचाउन मद्दत गरेको थियो।
जर्मनीको विमान अवतरण हुने बित्तिकै अमेरिकी सैन्य चिकित्सकको टोलीले आमा र बच्चालाई सहयोग गरेका थिए । बच्चा र आमा दुवैको अवस्था राम्रो रहेको र उनीहरूलाई जर्मनीको एक अस्पतालमा भर्ना गरिएको छ । एजेन्सी
