खुल्न थाले अफगानिस्तानका बैंक, पैसा झिक्नेको लामो लाइन
एक प्लेट खानाकै एक सय डलर
काठमाडौं, १० भदौं । एक साताभन्दा लामो समय बन्द रहेका अफगानिस्तानका बैंकहरू खुल्न थालेका छन् । बैंकहरू खुल्न थालेसँगै बैंकमा पैसा निकाल्नेको भीड देखिएको छ । अगष्ट १५ मा अफगानिस्तानका राष्ट्रपति असर्फ घानीले मुलुक छाड्नुभन्दा केही समयअघि मुलुकका सबै वित्तीय संस्था बन्द भएका थिए ।
शुरुमा तालिबान काबुल प्रवेश गरेसँगै हुन सक्ने युद्धको आशंकामा सबै बैंक बन्द भएका थिए भने अमेरिकाले अफगानिस्तानको केन्द्रीय बैंकको ७ अर्ब डलरमा तालिबानलाई पहुँच नदिने निर्णय गरेसँगै बढेको आशंकाका कारण वित्तीय संस्थाहरु बन्द थिए ।
अफगानिस्तानमा दैनिक कामको लागि नगद रकम आवश्यक पर्ने भएकाले मानिसहरूले आफ्नो बैंकमा रहेको पैसाले काम चलाउन पाएका छैनन् । यसअघि तालिबानले मुलुकमा कब्जा जमाएसँगै अफगानिस्तानका एटीएममा ठूलो संख्यामा मानिसको भीड लागेको थियो ।
एक प्लेट खानाकै एक सय डलर
विद्रोही समूह तालिवानले सत्ता कब्जा गरेपछि अफगानिस्तान छोडेर बाहिरिने क्रममा काबुल विमानस्थलमा भेला भएका सर्वसाधारणले निकै महङ्गोमा खाना र पानी किन्नु परेको छ ।
उनीहरुले एक प्लेट खानाका लागि १ सय र एक बोतल पानीका लागि ४० अमेरिकी डलर तिर्नु परेको बीबीसीले जनाएको छ । हजारौंको संख्यामा भेला भएकाहरूले गर्मीको सामना पनि गरिरहनु परेको छ । काबुल विमानस्थलमा अमेरिकी र बेलायती सेनाले पानी र खाना उपलब्ध गराए पनि सयौं मानिसले खान समेत नपाएको स्थिति छ ।
विमानस्थलमा अफगानी मुद्राको साटो अमेरिकी डलरमा कारोबार हुँदा खाना किनेर खान समेत कठिनाइ भएको स्थानीयले जनाएका छन् । खाना र पानी नपाएर कतिपय महिला र बालबालिका बेहोस हुन थालेका छन् । देश छाडेर बाहिर जान चाहने करिव ५० हजार अफगानी काबुल विमानस्थलमा विमानको प्रतीक्षामा छन् ।
विमानस्थल बाहिर पनि हजारौंको संख्यामा मानिसहरू भेला भएका छन्, उनीहरूलाई आ–आफनो घर फर्कन तालिवान समूहले धम्की दिइरहेको बुझिएको छ । एजेन्सी