‘एसएमजी’ हतियार चोरीमा दुई सैनिकलाई सफाई, तीन वर्ष बढुवा रोक्का
काठमाडौं, १८ भदौं । चितवनस्थित नेपाली सेनाको कालीबहादुर गणबाट हतियार ‘एसएमजी’ चोरेको आरोप लागेका दुई सैनिकले सफाइ पाएका छन् । ‘एसएमजी’ चोरी गरेको आरोपमा २८ महिनादेखि कारागारमा रहेका कालीबहादुर गणका अमल्दार लवकुमार गुरुङ्ग र जवान सरोज तामाङ्गले सफाइ पाएको अधिवक्ता सोमनाथ ढुंगानाले जानकारी दिए ।
उच्च अदालत पाटनका न्यायाधीश लोहितचन्द्र शाह, रक्षा मन्त्रालयका सचिव बोगेन्द्रराज शर्मा पौडेल र सेनाको प्राड विवाक प्रमुख उपरथी रत्नप्रकाश थापा सम्मिलित सैनिक विशेष अदालतले बिहीबार उनीहरुलाई सफाई दिने फैसला गरेको ढुंगानाले बताए ।
दुई सैनिकलाई हतियार चोरी र ड्युटीमा लापरवाही गरेको अभियोग लगाइएको थियो । चोरीमा सफाई पाएका दुई सैनिकलाई २०७५ मंसिर ४ बाट लागु हुनेगरी ३ वर्षसम्म बढुवा रोक्ने गर्ने फैसला गरिएको छ । विशेष सैनिक अदालतले उनीहरुलाई कालीबहादुर गणमा हाजिर गराउन आदेश गरेको छ ।
कालीबहादुर गणबाट हतियार चोरेर सैनिक जवान गंगाधर ढकालले हुद्दा भरत गुरुङको हत्या गरेको नेपाली सेनाको समरी जनरल सैनिक अदालतले ठहर गरेको छ । सैनिक अदालतले बिहीबार महेन्द्र दल गणमा कार्यरत ढकाललाई ढकाललाई २५ वर्ष कैद सजाय हुने फैसला गरेको सैन्य प्रवक्ता (सहायकरथी) सन्तोष बल्लभ पौड्यालले बताए ।
महेन्द्र दल गणमा कार्यरत ‘साथी’ हुद्दा भरत गुरुङको हत्यामा संलग्न अभियोगमा ढकाललाई प्रहरीले साउन ७ मा चितवनको टाँडीबाट पक्राउ गरेको थियो । चितवनको भरतपुर महानगरपालिका–१७ स्थित सिमलडाँडा खेत नहरमा गुरुङ मृत फेला परेका थिए । प्रहरीको अनुसन्धानबाट कालीबहादुर गणबाट चोरेको सट मेशिन गन ‘एसएमजी’ प्रयोग गरेर उनले गुरुङको हत्या गरेको खुलेको थियो ।
ढकालसँगबाट बरामद भएको र ०७५ मा चोरी भएको ‘एसएमजी’ को नम्बर मिलेपछि २८ महिनादेखि जेलमा रहेका कालीबहादुर गणका अमल्दार लवकुमार गुरुङ र जवान सरोज तामाङले न्याय पाएका छन् । लवकुमार र सरोजले २०७६ वैशाख ६ मा समरी जनरल सैनिक अदालतले गरेको निर्णयविरुद्ध उनीहरुले जंगी अड्डास्थित विशेष सैनिक अदालतमा पुनरावेदन गरेका थिए ।
