फार्मेसीको बिल तिर्न नसक्दा बीपी प्रतिष्ठानमा चार दिनदेखि सुत्केरीको शव बन्धक
सुनसरी, २२ भदौं । फार्मेसीको बिल तीर्न नसक्दा बीपी कोइराला स्वास्थ्य विज्ञान प्रतिष्ठान धरानमा चार दिनदेखि एक सुत्केरीको शव बन्धक बनेको छ । सर्लाहीको हरिपुर्वा नगरपालिका–८ दशरथपुरका रामचन्द्र माझीकी २८ वर्षीया श्रीमती पुनम माझीको गएको शनिबार साँझ बीपी कोइराला स्वास्थ्य विज्ञान प्रतिष्ठानमा मृत्यु भएको थियो ।
तर, स्थानीय अरविन्द्र यादवको फार्मेसीमा माझीले औषधिको ३ लाख ५ हजार रुपैयाँ तिर्न नसक्दा फार्मेसी सञ्चालकले पुनमको शव रोकेका हुन् । आर्थिक रुपले अति विपन्न माझी सुत्केरी पत्नीको शव अस्पतालले नदिँदा समस्यामा छन् । ‘फार्मेसी सञ्चालकले पैसा तिरेपछि मात्र शव लैजान दिन्छु नत्र दिन्न भनेका छन्,’ औषधिको बिल तिर्न भौतारिरहेका माझीले भने, ‘हामी गरिबसँग त्यत्रो रुपैयाँ छैन, अस्पतालले बाहिर निकालेको शव अहिले औषधि पसलेले रोकेका छन् । औषधिको रकम तिर्न अब चन्दा उठाउनु बाहेक अर्को विकल्प छैन ।’
माझीले पत्नीको शव अस्पतालले नदिएको भनेर गाउँमा फोन गरेपछि अहिले गाउँलेहरु चन्दा संकलन अभियानमा जुटेका उनले बताए । फार्मेसी सञ्चालकले धम्काएपछि रामचन्द्रले अस्पतालसँग पनि हरहिसाब मागेका छैनन् । अस्पतालले पैसा बिनै पनि शव दिएको थियो । पछि फार्मेसी सञ्चालकले शव रोक्दा उनी सडकमा भौतारिन थालेका छन् ।
‘फार्मेसी सञ्चालकले ले ३ लाख ५ हजार रुपैयाँ बुझए मात्र शव दिन्छु, नत्र दिन्न भनेको छ,’ माझीले भने, ‘मसँग अब करिब चार सय रुपैयाँ मात्रै बाँकी छ । हामी एकदमै गरिब छौं । जायजथा केहि छैन । फार्मेसीलाई त्यत्रो रुपैयाँ कहाँबाट ल्याएर तिर्नु ?’ पुनमलाई सुत्केरी व्यथा लागेपछि २२ दिनअघि जनकपुरधाम उपमहानगरपालिका–९ मा मापदण्ड विपरीत खुलेको मधेश हस्पिटलमा भर्ना गरिएको थियो । त्यहाँ एक दलाल मार्फत सुत्केरी गराउन पुनमलाई लगिएको थियो ।
शल्यक्रिया मार्फत पुनमले दुई शिशु (छोरा)लाई जन्म दिएकी थिइन् । शल्यक्रिया गरेदेखि नै पेट फुल्दै गएपछि भोलिपल्ट अस्पतालले उनलाई बाहिर लैजान दबाब दिएको थियो । कारबाहीमा पर्ने डरले अस्पताल सञ्चालकले आफैँले एम्बुलेन्स खोजेर पुनमलाई धरान पठाएका थिए । धरानमा उपचारकै क्रममा पत्नीको मृत्यु भएको पति रामचन्द्रको भनाइ छ ।
मापदण्ड विपरीत नै जनकपुरको थापा चोकमा सञ्चालित समर हस्पिटलमा कार्यरत केहि एचए लगायतका स्वास्थ्यकर्मीले मधेश हस्पिटल खोलेका हुन् । समर हस्पिटलका सञ्चालक सुजित यादवले उनीहरु पहिले आफ्नै अस्पतालमा काम गर्ने मान्छे भएको बताए ।
