एक लाख ४४ हजार नगदसहित आठ जुवाडे पक्राउ
चितवन, ३० भदौं । चितवनको खैरहनीमा एक लाख ४४ हजार रुपैयाँ नगदसहित आठ जुवाडे पक्राउ परेका छन् । पक्राउ पर्नेमा खैरहनी नगरपालिका–८ का कृष्ण श्रेष्ठ र विष्णु सुनार, खैरहनी–६ का नवीन बस्नेत छन् ।
यस्तै, राप्ती नगरपालिका–६ का सुदीप गिरी, दीपेश बर्तौला, चूडामणि थपलिया, राप्ती–४ का केशवप्रसाद तिमिल्सिना र राप्ती–५ सुदन धरेल पनि पक्राउ परेका छन् । जिल्ला प्रहरी कार्यालय चितवनका अनुसार खैरहनी–८, लक्ष्मीनगरस्थित कृष्ण श्रेष्ठको घरमा तास तथा कौडा खेलिरहेको भन्ने सूचनाको आधारमा खटिएको प्रहरी टोलीले मंगलबार साँझ श्रेष्ठ समेत आठजनालाई नियन्त्रणमा लिएको हो ।
उनीहरूको साथबाट एक लाख ४४ हजार १७० रुपैयाँ बरामद गरिएको प्रहरी नायब उपरीक्षक नरहरि अधिकारीले जानकारी दिए । थप अनुसन्धान भइरहेको प्रहरीले जनाएको छ ।
