नेपाल आइडलका बुद्ध लामा भन्छन्, ‘आठ महिना भयो पुरस्कार दिनुको सट्टा उल्टै आठ लाख माग्छन्’
काठमाडौं, २४ फागुन : पहिलो नेपाल आइडल विजेता बुद्ध लामाले घोषित पुरस्कार आठ महिनासम्ममा पनि नपाएको भन्दै आक्रोश पोखेका छन् । गत दशैमा सम्पन्न पहिलो नेपाल आइडल विजेता बुद्ध लामाले २० लाख रुपैयाँ नगदसहित महिन्द्राको केयुभी गाडी पाएका थिए ।
नेपाल आइडल विजेता लामाले घोषित पुरस्कार महिन्द्राको केयुभी गाडी नपाएको गुनासो गरेका छन् । उनले भनेका छन्, ‘आठ महिना भईसक्यो धाउँदा–धाउँदै दुःख पाइसकें अझै कति धाउनु ? गाडी लैजाने हो भने ट्याक्स बापतको आठ लाख रुपैयाँ लिएर आउनु गाडी लैजानु भन्छन् । घरमा एक रुपैयाँ छैन मैले कहाँबाट ल्याउनु त्यत्रो पैसा ? ल मेरो यो समस्या कसरी बाहिर ल्याउन सकिन्छ सहयोग गरिदिनु पर्यो ।’
लामाले २० लाख रुपैयाँ नगद, महिन्द्राको केयुभी गाडीसहित १५ लाख बराबरको भिडियो एल्बम र कन्ट्रयाक्ट पाएका थिए । उनले नगद २० लाख त पाए तर, कार भने अझै नपाएको गुनासो गरेका छन् । आइडल विजेता लामाले एउटा अडियो सन्देशमार्फत कार नपाएको खुलासा गरेका हुन् । उनको सन्देश सामाजिक सञ्जालमा निकै भाइरल भईरहेको छ ।
