आवश्यकता र प्राथमिकताका आधारमा वैदेशिक सहायता खर्च गरिन्छ : प्रधानमन्त्री
प्रधानमन्त्री देउवा र विश्व बैंकका दक्षिण एशिया उपाध्यक्ष सेफरबीच भेटघाट
काठमाडौं, ५ असोज । प्रधानमन्त्री शेरबहादुर देउवाले दाताहरुले प्रदान गर्ने सहयोग देशको आवश्यकता र प्राथमिकताका आधारमा सरकारले खर्च गर्ने बताएका छन् ।
प्रधानमन्त्री तथा मन्त्रिपरिषद्को कार्यालय सिंहदरबारमा सोमबार प्रधानमन्त्री देउवासँग विश्व बैंकका दक्षिण एशिया हेर्ने उपाध्यक्ष हार्टविग सेफरले भेट गर्ने क्रममा यस्तो बताएका हुन् । प्रधानमन्त्री देउवाले विश्व बैंकले प्रदान गर्ने सहयोग नेपाल सरकारले आफ्नो आवश्यकता र प्राथमिकताअनुसार खर्च गर्ने गरेको प्रष्ट पारेका हुन् ।
प्रधानमन्त्री देउवाले विश्व बैंकले नेपाललाई कोभिड–१९ विरुद्धको खोप खरिद, कोभिड–१९ पछिको परिस्थितिसँग जुध्न तथा भूकम्प पछिको पुनर्निर्माणलगायत क्षेत्रमा गरेको सहयोगका लागि उपाध्यक्ष सेफरलाई धन्यवाद पनि दिए ।
विश्व बैंकको सहयोगमा हाल नेपालमा दुई दर्जनभन्दा बढी विभिन्न आयोजना सञ्चालित छन् । प्रधानमन्त्री देउवाले नेपाल सरकार सुशासनप्रति सदैव प्रतिबद्ध रहेको उल्लेख गर्दै जलवायु परिर्वतनको प्रभाव न्यूनीकरणका क्षेत्रमा उल्लेखनीय काम गरिरहेको र आगामी दिन वातावरण सुधारका लागि थप व्यवस्थित रूपमा कार्य अघि बढाउने गरी प्रणालीको विकास गरेको समेत जानकारी गराएका छन् ।
प्रधानमन्त्री देउवासँगको भेटबारे उपाध्यक्ष हार्टविग सेफरले कोभिड–१९ विरुद्धको कार्य, जलवायु परिवर्तन, कनेक्टिभिटी र आर्थिक पुनरुत्थानमार्फत् नेपाललाई अझ राम्रो बनाउन नेपाल सरकारले राखेको प्राथमिकताबाट आफू निकै उत्साहित भएको उल्लेख गरेका छन् । नेपाललाई आवश्यक सहयोग गर्न विश्व बैंक सँधै तयार रहेको पनि उनले सामाजिक सञ्जाल ट्वीटरमार्फत् उल्लेख गरेका छन् ।
It was an honor to meet with Rt. Hon. Prime Minister @SherBDeuba. I am encouraged by the government's focus on a swift and effective #COVID19 response, climate change, connectivity and economic recovery to build back #Nepal better. The World Bank stands ready to support. pic.twitter.com/VXkWsdPhyY
— Hartwig Schafer (@HartwigSchafer) September 21, 2021
