१९ लाख नगदसहित मध्यराति काठमाडौंबाट १३ जुवाडे पक्राउ
काठमाडौं, ७ असोज । काठमाडौंको कागेश्वरी मनोहरा नगरपालिकाबाट प्रहरीले झण्डै १९ लाख रुपैयाँ नगदसहित १३ जना जुवाडेलाई पक्राउ गरेको छ ।
गए राति १२ बजे कागेश्वरी मनोहरा ७ हरहर महादेवबाट १८ लाख ७५ हजार ५ सय रुपैयाँ नगदसहित उनीहरुलाई पक्राउ गरिएको महानगरीय प्रहरी प्रभाग काँडाघारीले जनाएको छ । उनीहरुको साथबाट प्रहरीले सात सेट तास पनि बरामद गरेको छ ।
विशेष सुराकीको आधारमा पुगेको प्रहरीले मध्यराति स्थानीय कमल दाहालको घरमा तास खेलिरहेको अवस्थामा उनीहरुलाई पक्राउ गरेको हो । उनीहरुको नाम भने प्रहरीले सार्वजनिक गरेको छैन । पक्राउ परेकाहरुलाई आवश्यक कानुनी कारबाही अघि बढाइएको प्रहरीले जनाएको छ ।
यसैबीच प्रहरीले काठमाडौंको कपनबाट पनि जुवातास खेलिरहेका ६ जनालाई पक्राउ गरेको छ । बुधबार साँझ २५ हजार ५ सय ५ रुपैयाँसहित उनीहरुलाई पक्राउ गरिएको प्रहरीले जनाएको छ ।
