बाजुरामा प्रहरी र कांग्रेस कार्यकर्ताबीच झडप : एक प्रहरी घाइते, मत गणना अनिश्चित
बाजुरा, २० असोज । नेपाली कांग्रेसको १४औं महाअधिवेशनअन्तर्गत बाजुरामा भएको जिल्ला अधिवेशनका क्रममा झडप भएको छ ।
जिल्ला निर्वाचन समितिका प्रवक्ता प्रेम रौलेले हिजो मतदान सकिएर मत पेटिका व्यवस्थापन गर्ने क्रममा प्रहरी र कांग्रेस कार्यकर्ताबीच झडप भएको जानकारी दिए । जिल्ला प्रहरी कार्यालयका प्रहरी नायब उपरीक्षक मदनजित महराले उक्त घटनामा एक जना प्रहरी घाइते भएको बताए । घाइते प्रहरीको अवस्था सामान्य छ ।
वीरेन्द्र गिरीसहितका कार्यकर्तालाई प्रहरीले नियन्त्रणमा लिएको छ । हिजै राति ११ बजेबाट मत गणना गर्ने तयारी गरिएकोमा झडपपछि मत गणनाको काम अनिश्चित बनेको प्रवक्ता रौलेले जानकारी दिए । कांग्रेसको जिल्ला अधिवेशनमा सभापति पदका लागि कविराज पण्डित, रामसिंह रावल र चक्र शाहीबीच प्रतिस्पर्धा भइरहेको छ । जिल्ला अधिवेशनमा कांग्रेसका एक हजार २१२ मतदाता रहेको बताइएको छ । रासस
