रसुवागढी नाकाबाट दुई दिनमै भित्रियो ३६ कन्टेनर स्याउ
रसुवा, २५ असोज । दशैंमा फलफूलको व्यवस्था मिलाउन नेपाली व्यवसायीले रसुवागढी नाकाबाट स्याउ आयात गरेका छन् । शनिबार र आइतबार दुई दिनको अन्तरालमा ३६ कन्टेनर स्याउ नेपाल भित्रिएको छ ।
सो नाकाबाट ठूलो परिमाणमा स्याउ भित्रिएसँगै दशैंका लागि नेपाली बजारमा फलफूलको आपूर्ति सहज हुने आंकलन गरिएको छ । नेपाल भित्रिएको स्याउ भन्सार प्रक्रिया पूरा गरी धमाधम काठमाडौं लाने क्रम शुरु भइरहेको रसुवा भन्सार कार्यालय टिमुरेका सूचना अधिकारी एवं भन्सार अधिकृत नरेन्द्रप्रसाद चौधरीले बताए ।
चाडपर्वमा फलफूलको अभाव हुन नदिन व्यवसायीले स्याउलगायत तयारी पोसाक, जुत्ता, चप्पल जस्ता सामग्री आयातलाई पहिलो प्राथमिकता दिंदै आएका छन् ।
