रुवी खानलाई तत्काल रिहा गर्न सर्वाेच्चको आदेश
काठमाडौं, २८ असोज । सर्वोच्च अदालतले प्रहरी हिरासतमा रहेकी महिला अधिकारकर्मी रुवी खानलाई तत्कालै रिहा गर्न आदेश दिएको छ ।
अधिकारकर्मी मोहना अन्सारीले दिएको बन्दी प्रत्यक्षीकरणको निवेदनमाथि आज (बिहीवार) सुनुवाइ गर्दै न्यायाधीश अनिलकुमार सिन्हाको इजलासले रुवी खानलाई तत्कालै रिहा गर्न र पुनः धरपकड र फक्राउ नगर्न आदेश दिएको हो ।
बाँकेका दुई जना महिलाको हत्यारालाई कारबाहीको माग गर्दै समूहसहित नेपालगञ्जबाट २० दिन हिँडेर काठमाडौं आएकी रुवीलाई प्रहरीले पक्राउ गरेको थियो । उनीलाई काठमाडौंबाट पक्रेर प्रहरीले पुनः बाँके पुर्याएको थियो ।
रुवीले बाँकेको प्रहरी हिरासत र अस्पतालमा समेत आमरण अनशन शुरु गरेकी थिइन् । उनलाई प्रहरीले बहुविवाहको मुद्दा लगाएको छ ।